بسم الله نبتدي في الرقاق الأكلات المصرية S_thum1.gif

اولا الرقاق عبارة عن نوع من أنواع الخبز وبيكون رفيع جدا علشان كده سموه رقاق (رفيع وناشف لدرجة انه بينكسر) ومش عارفة بصراحة في في الخليج ولا لأ

والرقاق سره في السمنة والتسوية فركزوا معايا، طيب ؟

المقادير لعمل صينية مدورة متوسطة

صينية صغيرة على قدر حجم الرقاقة يعني تقريبا مقاس 25 أو 28 ، وصينية أكبر شوية

سمنة سايحة

6 رقاقات

شوربة دافية (شوربة لحم)

1-2 ك لحم مفروم معصجة (ابشري بصلة كبيرة وحمريها في السمنة لما تذبل ضيفي لها اللحم وقلبيها على نار هادية لحد ما تستوي ضيفي لها فلفل اسود مطحون وقرفة وملح )

الطريقة

ركزوا معايا لأنها سهلة خالص والله لكن في ناس مش بتعرف تضبطه

1- افردي ملعقتين سمنة كبيرة في الصينية الصغيرة بحيث تعمل طبقة سمنة وتكون باينة في الصينية (هنحمر فيها)

2- امسكي كل رقاقة وصبي عليها كبشة شوربة من الناحيتين بحيث ما تكونش طرية (يعني يدوبك بليها) ويا ريت الشوربة ما تكونش سخنة علشان ما تبوظوش

3- كل رقاقة تسقيها الشوربة حطيها في الصينية اللي دهناها سمنة وادني وجهها بسمنة سايحة بالفرشة (علشان تبقى فطيرة مورقة)

4- بعد ما تعملي 3 رقاقات ضيفي اللحم المعصجة فوقهم وكملي باقي الرقاقات فوق اللحم زى اللي قبلهم

5 خلاص دلوقت بقى عندنا فطيرة رقاق

التسوية

ركزوا بقى في دي

1- على عين متوسطة فوق البوتاجاز حطي صينية الرقاق وحمري جزء جزء منها (يعني افضلي تدوري في الصينية على العين لحد ما تحسي ان الجزء التحتاني اتحمر)

2- ادهني وجه الرقاق بقطعة سمنة كبيرة

3- هاتي الصينية الكبيرة وادهنيها سمنة معلقتين كبيرة زى ما عملنا في الصينية الصغيرة

4- بشويش خالص حطي الصينية الكبيرة فوق الصغيرة بحيث الصغيرة تدخل فيها واقلبيها زى ما بتعملي في المقلوبة (فهمني يعني انتي زى ما تكوني بتغطي الصينية اللي فيها الرقاق بالصينية الثانية) وبعدين القلبيها بالراحة ولو حسيتي انها لازقة شوية سلكيها بطرف السكين بالراحة

5- دلوقت قلبت الرقاق حمري بقى الوجه الثاني زى ما عملنا في الجزء اللي فات

6- بعد ما تخلصي اقلبيها في طبق التقديم وقطعيها مربعات او زى ما تحبي وبالهنا والشفا

فطيرة الرقاق بالطريقة دي بتكون طرية من جوة ومقرمشة من برة وبتكون طعمها هاااااااااااااااااايل الأكلات المصرية S_thum1.gif

في ناس بتستسهل وتدخلها الفرن لكن الفرن بينشفها ومش بتكون بنفس الطعامة

وابقوا ادعوا لي الأكلات المصرية Oc_sun1.gifالأكلات المصرية Ob_mak1.gif