like facebook


views : 4589 | replycount : 3
النتائج 1 الى 4 من 4
  1. #1
    جميلة الرياض غير متواجد حاليا ملك المنتدى
    تاريخ التسجيل
    Mar 2009
    الردود
    2,598
    حبيت انزل لكم قصه في قمة الرروعه ( افهم انك تموت وما تثير اهتمامي)



    للكاتبه : انسكاب الجاذبيه




    الفصل الاول


    طلال وسمر مالهم يوم متزوجين و بالطريق من الدمام لرياض ومسافرين على السياره الساعه 2 بالليل

    سمر: لا ماله داعي كذا احسن بدون صوت اهداء

    طلال:بس طفش كذا راح اشغل راب

    سمر : شوف اذا بتشغل شغل شي ينبلع قال راب قال

    طلال طنش سمر وشغل الاستريوا ومن زود العناد شغل راب كمان

    سمر: اقالك تعاند انت

    طلال : .........<< ساكت ويهز براسه وشكله ناوي يهبل في سمر

    سمر: اكلم جدار انا

    طلال:..........<< ساكت ويرقص ولا كان احد يتكلم

    سمر قدر طلال ينرفزها عصبت بس حاولت تهدي وتبرد قربت من الاستريو وحولت على الرادوا وكان اغنيه راشد عشان الحب وابتسمت بانتصار كانها مسويه شي عظيم

    طلال : خخ تستهبلين انتي

    سمر : لا انا ماستهبل ولا احب الاستهبال

    طلال طنش سمر ورجع على السيدي اللي كان مسويه هو وربعه ايام الثانويه و راميه في اخر درج في السياره اخر مره شغله ايام تخرجه من الثانويه طلال كان يحب السيدي هذا كثير وكان فيه اغاني كثير فوق 800 اغنيه كان فيه اغنيه لمساري هذا سمر كانت تحبه ايام المراهقه

    نسرتجع موقف :


    سمر:وااا ااااء <<صراخ بنات المتوسط المعروف كانه صفارات انذار

    هتاف : بس يا سمر فضحتينا

    سمر : بالله جبتي صورته ولا تستهبلين

    هتاف : ايووه ايووه جايبتها بس اسكتي لا تكلبشنا الاداره

    ( سمر وهتاف هاربين من الحصه )

    سمر : طيب وين الصوره اللحين ؟

    هتاف : عند براده الثنوي مغبيتها ما قدرت احطها في شنطتي يقولون شله فازلين انه فيه تفتيش اليوم

    سمر : يوه ولله بلشه يعني اذا رحنا عند براده الثنوي راح تشوفنا مراقبه الثنوي ويوصل الخبر لادارتنا واستلم التعهد يا بنت

    هتاف : اخيرا بديتي تفكرين صح

    سمر : بس ما علي ببروح اجيبها واللي يصير يصير
    (سمر راحت وتركت هتاف )

    هتاف تكلم نفسها بياس : طايشه تظل طايشه مهما فكرت صح

    سمر وهي تركض تبي تعدي فصول الثنوي عشان توصل لدورات المياه

    سمر كان شكلها ملفت لدرجه فضيعه في ايام المتوسط كانت قاصه قصه امل حجازي بياع الورد

    وصابغه شعرها ملون بنفسج وموف وسماوي وتدرجات الاخضر ومريولها مره مززبرق كانه ثوب عرس الله يصلحها يعني خصر نازل وجيووب وحديد مدري من وين طالع والي يقرقش عند كمها يعني مللفته ومميزه بين البنات <<يعني البنت طايشه ومطنشه العالم

    وهي تركض ما شافها احد وحمدت ربها وعينت من الله خير وقامت تدور على الصوره في البراده كانت ماده يدها من وراء البراده وتحاول توصل لصوره لما وصلت لها وجابتها وطلعت يدها وقامت تتامل بصوره بعيوون كلها امل وفررح ودموع وحابسه صرختها .. مرت ممكن ثلاث دقايق وهي تتامل الصوره قالت في نفسها : يووه لازم ارقى اللحين هتاف سابقتني على الصف . ما رفعت راسها الا مراقبه الثنوي واقفه قدام وجهها

    المراقبه : وش تسوي بنت متوسط في حمامات الثنوي

    سمر بخوف: استاذه كنت ناسيه شغله هنا <<<مشكلتك يا سمر ما تعرفين ترقعين >>

    المراقبه : لا باللهي وشي الشغله تلقينه قلووس ولا رسايل مدري وش تبي <<تقصد رسايل الاعجاب>>ولا خرابيطكم يالمتوسط

    سمر : لا استاذه وش دعوه بس انا كنت ادرس في الفسحه ونسيت الملخص هنا <<ما تنبلع يا سمر ملخص بالحمامات >>

    المراقبه: وش منزلك من دور المتوسط لدور الثناوي (( مدرسه سمر كانت دورين للمتوسط والثانوي وممنوع احد من بنات المتوسط ينزل تحت او من بنات الثنوي يرقى فوق الا في الفسحه))

    سمر : يووه وش فيك يا استاذه قلت لك ناسيه الملخص هنا ((تخبي صوره مساري ورا ظهرها))

    المراقبه: وريني الملخص هذا

    سمر : لا

    المراقبه : وشي لا هاذي

    سمر : لا يعني لا

    المراقبه: بتويريني ولا وشلون <<تناظرها نظرات تهديد

    سمر : لا ماني موريتك وريني وش بتسوين <<سمر تخاف من المعلمات عموما لاكن تحاول انها ما تبين هالشي

    المراقبه : وش قله الادب هاذي كذا تكلمين احد اكبر منك

    سمر : ولله اذا كان وقح ويتطفل على خصوصيات الغير مستعده اكلمه كذا <<مهوويه البنت

    المراقبه: بدق على ادارتكم تتصرف معك اذا ما وريتيني
    سمر كانت عارفه ايش بيصير اذا ورتها لانه واصل واصل للاداره عشان صداقات المعلمات وحشهم في الطالبات وكذا \\ سمر قالت خاربه خاربه خلين اخذ موقف قووي

    سمر : دقي وريني ايش بتسوين

    اخذت مراقبه الثنوي سمر على غرفه الاداره في دور المتوسط بدون ما تدق وبدون شي من وسع الوجه

    المديره : خير ان شاء الله يا استاذه مها

    المراقبة : لمي بنات يا استاذه هيله كل يوم والثاني جايه بنت تتسكع تحت وتزعج ومدري ايش تسوي بالحمامات <<مشكله التفكير المنحرف >> وتقول ايش ناسيه الملخص وراء البراده ابي افهم وش جاب الملخص وراء البراده مدري وما كانه عندها حصه ..

    المديرة : العذر والسموحه يا استاذه مها ولله تعرفين احيان نكون مشغولين مع التوجيه وتنظيم حفلاتهم اعذرينا فما ننتبه>>الله من زين العذر << للبنات اذا نزلوا ورقوا بالعده تكون فيه وحده تهش هم عند الدرج <<,وشي تهش هم ذي حيوانات هم

    المراقبه : صار خير وكل شي ممكن نعديه الا وقاحه الطالبه مع وحده اكبر منها مو كننا تحت رعايه وزاره التربيه

    المديره سحبت المراقبه برا غرفه الاداره قريب من الباب يعني وتركوا سمر في غرفه الاداره المراقبه قاعده تحكي للمديره اللي صار
    وسمر في غرفه الاداره ما تدري وش تسوي

    وهي قاعده تتفرج على التحف والكراسي والطاولات شافت كمبيوتر المديره مفتوح اشتغل هرمون اللقافه راحت تشوف وش فيه لقت المديره فاتحه برنامج الوورد تكتب فيه التقارير وفيه ايميل المدرسه موجود ايميل جديد من التوجيه كتبت ايميل لتوجيه

    انا مديره المتوسطه ال..... في محافظه الدمام : هيله العسكر

    قررت منع طالباتي من المشاركه بحفل تافهه لا يحوي اي شي من الاهميه سوى تكريم بعض معلماتكم غير الجديرات بتكريم وانا هنا اهتم بحفلكم التافهه وارى اني اهملت السواليف مع المعلمات ودق الحنك معهم

    لاجل ذالك نرجوا ان تضفوا عفشكم

    ____________________________

    (وحطت صوره الختم وصوره توقيع المديره )

    ارسلت الايميل
    ومسحته من المرسله

    ورجعت مكانها لا من شاف ولا من درى ((لعينه ذا البنت ))

    المديره دخلت وججها احمر من العصبيه طبعا المراقبه زودت من عندها


    بداء التهزيء :

    المديره : وريني وش اللي معك يابنت

    سمر : لا
    المديره : اقول وريني لا بالعصى

    سمر : ما تقدرين تضربيني الوزاره مانعه الضرب وماني اصغر عيالك عشان تصرخين علي كذا

    المديره : لا لا طاالت وشمخت شين وقويه عين انتي ما تستحين على وجهك ما ربوك اهلك على احترام اللي اكبر منك اذا ما ربوك قولي لي اربيك

    سمر : انا مربيه غصبن على اللي مو عاجبه اهلي مربييني احترم اللي اكبر مني بس لا صار عقله صغير
    ويقول كلام اصغر من سنه يعني كلام بزران ما اقدر احترمه لانه ما ...((قطعتها المديره))

    الديره : انتي ووقحه وما تربيني استكي يا قليله الحياء
    وريني وش اللي بيدك ((اخذتها من يدها بالقوه )) يا ووقحه يالصاايعه ياللي ما تربيتي تجيبين صور عيال للمدرسه اذا انتي صاايعه خلي صياعتك ببيت اهلك لا تخربين المدرسه كلها يالجرثومه

    سمر: ما اسمح لك تتكلمين معي بهالطريقه انا مربيه غصبن عليك وبنت عالم وناس وماني صايعه كلن يشوف الناس بعين طبعه ما سويت شي غلط ولا حرام ..((قطعتها برضوا )

    المديره : انطمي ولا كللمه انطميي يا بنت الشوارع وش منزلك عند الثانوي هاه وش تسوين تحت تكلمي تكلمي

    سمر تضحك : هه استغفر الله وش هالنفسيه قبل شوي تقولين لي انطمي الحمدالله والشكر اذا خاطبكم الجاهلون فقولوا سلاما

    في فصل هتاف يسمعون صراخ المديره ومعه صراخ سمر . .هتاف حست باللي صاير وحست انها سبب باللي يصير مع سمر انبها ضميرها كثيرر
    ____________________________________-

    المديره وقعت سمر تعهد وعطتها فصل تاديبي وكلمت اهلها وقالت كلام زي السم لاكن سمر كانت قوويه ما كانت تبكي وتشكي الا لمخدتها طلعت من غرفه الاداره تضحك وقبل لا تطلع قالت : معليش استاذه هيله ممكن الصوره اللي اخذتيها مني ؟ لانها ملكيه خاصه فيني واذا اخذتيها يعتبر استيلاء

    المديره : خوذيه يا قليله الحيا وش ابي فيه انا مرقمته هذا بمجمع الظهران

    سمر :هههه استاذه هذا مو واحد عادي هذا المغني مساري اللي يغني انت حياتي وبي ايزي

    المديره قامت تخانق وتحضرم سمر طلعت وهي تضحك وطنشتها

    سمر في الطلعه

    سمر:ايووه يا بناات راح اغيب اسبووع كامل

    شله فازلين : افااا لييه عطووك فصل

    سمر : بززبط اهوو داء شله فازلين بسافر لاهلي في الرياض مع اخوي مشعل قاعدين بالبيت ولله لا شغل ولا مشغله او يمكن نروح البحرين صباح السبت

    شله خويات بليس :افاا سمر بنشتاق لصرااخك وهوااشك

    سمر : هع عاارفه خويات وانا بعد بشتاق لكم

    سمر : وش تبون اجيب لكم شله حليب نياق ؟

    شله حليب نياق : نبي بطاقه شحن ام خمسين تعرفين عشان الترقيم بالمجمعات والاستهبال
    سمر :هع تولمووا بس دام فيها ترقيم تخسوون

    هتاف بهمس : سمر ممكن شوي

    سمر : عيوون سمر قلب سمر تامرين امر انتي

    سمر بعد ما ابعدت عن الصجه : هلا

    هتاف : انا اسفه ورطتك

    سمر : لا ياشيخه وش فيك انتي مالك دخل في الموضوع انا اللي متهوره بزياده

    هتاف : لا بس ولو انتي صديقتي مهما كان احس تصرفي كان غلط

    سمر : ماصار الا الخير يا شخيه وش صار عاد خناق وتعهد وفصل تاديبي عاادي ماصار الا الخير

    هتاف : تسمين هذا خناق وربي لو انه جبل ذاب من صراخها من جد كان المفروض اكون معك

    سمر : لا تخافين سكت والدينها صحيح هي تصارخ بس كلامها لا راح ولا جاء

    _______________________

    يتضح لنا من هالموقف جوانب كثيره من شخصيه سمر

    نرجع لطلال




    سمر : لا انا ماستهبل ولا احب الاستهبال

    طلال طنش سمر ورجع على السدي دي اللي كان مسويه هو وربعه ايام الثانويه وكان راميه في اخر درج في السياره اخر مره شغله ايام تخرجه من الثانويه طلال كان يحب السيدي هذا كثير لان فيه ذكريات كثيره وكان فيه اغاني لمساري هذا سمر كانت تمووت فيه ايام المراهقه وتحفظ اغانيه حفظ من قلب

    لما رجع على السيدي من الرادوا طلعت اغنيه لمساري سمر سكتت لحظه تتذكر هالصوت مو غريب عليها ايه واحد تعرفه فكرت فيه كثيرر في مرحله من عمرها وكانت ما تنام الا وهي تحلم فيه ايووه مسااري مسااري ايووه
    سمر تسوي نفسها غبيه : مين هذا المطرب اول مره اسمع له

    طلال مستغرب منها: هذا مساري ما تعرفينه

    سمر: هه لا ....<<بدون اهتمام حب مراهقه قديم راح واندثر هي بدون حب اللحين وعايشه حياتها بدون جروح

    تركت على المرتبه ونزلتها لتحت شوي تذكرت ايام المراهقه شوي وحبها الاول وحبها الثاني والثالث والرابع وتضحك على نفسها نامت من تعب السفر والمكيف يضرب عليها وباارد يخلي اللي ما ينام ينام كانت كاشفه راسها شعرها اسود مايل على البني طوله الى نص كتفها وجاي مووج ومحيوس بيضاء خدودها موورده وجهها مبدور رموشها طواال وخفيفه شفايفها ورديه هااديه مرتبه وملمومه على بعضها وملينانه عيونها مايله للبني امثر منه لسواد البنت شكلها وهي نايمه تخلي العاقل ينجن ملائكيه بشكل مع انها ما يقال عنها جميله بمعنى الكلمه لاكن الجمال الرباني يبان فيها عبايتها على كتفها والشيله على رقبتها ونايمه بهدوء اللي يشوفها وهي مرتاحه كذا والشيله محيوسه على كتفها وشعرها والجو اللي هي فيه يحس انه تعباان ويبغى يرتاح

    طلال تاملها شوي و الموسيقى تضرب ومو مراعي لاحد شعور <<<<اكررهه هالانسان هع

    طلال : سمر نمتي ؟؟

    سمر : . . . .

    طلال : سمرر <<<<<<<<<<<يصارخ ذا الدميجه مشكله طلال عفوي على لعانه ما تدري وش تسميه

    سمر فزت من نومها: ووجع وش هالصرااخ انت

    طلال : قومي

    سمر وودها تصكه كف : وليه اقوم تخاف من العوي انت <<سمر مستخفه فيه وتحسه بزر

    طلال : لا بس خايف انام ونروح فيها انا وياك

    سمر : بل بل بل اعووذ بالله فال الله ولا فالك طيب وذا المسجل اللي مزعجنا فيه ماله دور في الحياه يعني

    طلال : بس مو زيك

    سمر مو مستوعبه عليه ونصها نوم وماله خلقه : كيف يعني انا مهرج يضحكك و ما ينومك

    طلال : اووكي يالدميجه نامي

    سمر : لا عاد اخيرا طلع الحكم من مجلس وزاره الداخليه

    طلال : لا بس رحمتك يا ويلي شكلك مثير للشفقه ومين قالك اني بخليك تنامين على راحتك بعلي المسجل على الاخر تبيني انام ونموت يالخبله

    سمر : اعوذ بالله من ابليس بس

    طلال وسمر كلهم نوع مشكلجي ويحب اللي يجاريهم في الكلام عشان كذا يسايرون بعض بس تحس ان حياتهم كذا ما فيها ولا لحظه رومنس بس جايز يكون فيه


    سمر توها قايمه من النوم ما نامت الا ربع ساعه وتحس راسها بينفجر

    سمر : اووف وش هالصداع ياربي ااه

    طلال: فديت اللي يصدعون يا ناس

    سمر : وش اللي جابني في الشنطه

    طلال : العوي حقك اللي بيجيني ذاك تذكرينه

    سمر: اقوول طلييل تكلم م.ن.... ,, هيييي ووه يا عزيلي نايمه فوق الكفرات طول الوقت وسرعتك يالمهايطي 180 اجل بعذر راسي

    طلال : من جد اسف سوسو بس عجزت اقاوم

    سمر : وجع من معلمك الخرابيط وش تقاوم انت ووجهك

    طلال : ههه يا حليلك خفيفه دم عمري 22 طااعوون وش لازم اعرف هالخرابيط واصير مدرس بعد

    سمر: بززرر لا من جد وشلون جدعتني في الشنطه وانت تسوق

    طلال يتليعن : اوف جدعتيني ما لقيتي لفظ افضل منه

    سمر : لا من جد طليل

    طلال : ابد ولله لبقت وريحت لي عشر دقايق يوم اقوم واشوفك تقل بسه مشرده رحمتك شلتك وديتك ورى بس تراي مغطيك ومسوي لك فراش وذا بس تعرفين شغل التفحيط

    سمر : اقول طلال انت مستخف اليوم صح ؟

    طلال ما جاوب و يستفزها : امووت عليهم ياناس

    سمر : منهم ؟

    طلال : تغارين ؟

    سمر : من مين ؟

    طلال : تغارين علي

    سمر : خ خ خ يالثقه من زينك عاد

    طلال :وراي اهبل بسم الله علي بس انتي مو راضيه تقبلين ان رجلك احلى منك

    سمر جت جنبه قدام وقامت تتكلم بجديه لانه حست ان الوضع بداء يطور مع طلال ومعاها وهي مو راضيه تسمح لنفسها تحب مره ثانيه : طلال ممكن توقف شوي

    طلال بمكر : ليه ؟

    سمر بجديه : لو سمحت وقف

    طلال مستغرب منها : اوكي

    لبق طلال على الرصيف

    طلال باستغراب : وش فيه

    سمر : طلال اسمعني زين لا تنسى اني انا مغصوبه عليك وانت مغصوب علي طيب يعني شي مو فايدي ولا في ايدك انت تكرهني وانا اكرهك بس مجرد بنسكت العايله ونسوي تمثليه ونطلق طيب <<عقلها صغيير بزر ما ينشره عليها

    طلال : سمر وش هالكلام صحيح انا مغصوب عليك بس مو معانته اني اكرهك وسالفه الطلاق موجله حتى نشوف اذا قدرنا نعيش مع بعض ولا لا

    سمر : يعني انت ما تحب وحده وتبي تتزوجها

    طلال : هههه من قال انا ما احب احد ولا فكرت احب انا بس ما كنت ابي اتزوج اللحين وبصراحه لما شفتك حسيتك هاديه وما تحبين الخناق والج لجه والفله يعني ما تصلحين لي فاهمه بس طلعتي عكس كذا

    سمر : طيب انا ما احبك ولسه ابي اكمل دراستي وعندي طموح بحققه وتوني بزر على الزواج يعني ما ابييييي يييك

    طلال انسان رايق ودوبلوماسي وياخذ الامور ببساطه طلال : اذا على انك ما تحبيني اقدر اخليك تحبيني بيومين واذا على الزواج اعتبريني بوي فرندك مو زوجك وكملي دراستك وحققي طموحاتك ممكن نروح انا وياك ندرس برى كمان مرح نحمل انفسنا اي مسوليات بدري انا بعد ابي اعيش واستانس مع ربعي والانسانه اللي احبها ونعيش فتره مو كنا متزوجين وماعندنا مسوليات واذا حبيتيني اكيد بتصيرين تبيني <<امووت على الانسان المتفتح

    سمر هنا حست انه طلاال كببر بعينها وانه نفس تفكيرها ماعنده استعداد لزواج وينحب وطيب قلبه رايق ويحل المشاكل بطقه اصبع خلا الكابوس اللي هي فيه حلم وردي بكلمتين فوق بعظها سمر في قلبها فرح واحساس بنشوه الحياة وممكن تكمل حياتها زي اي بنت سمر عمرها 19 سنه وتحس انها صغيره على الزواج مع انه مو مره صغيره بس الدلع عامل عمايله


    س1سمر راح تحب طلال ولا مجرد اعجاب وتقبل ؟
    س2طلال صادق باللي قاله ولا بس يبي يهبل في البنت ويستهبل فيها ؟
    س4هتاف راح تدخلين معنا في الروايه ولا بس تكوني من سوابق سمر ؟
    س5مين راح يقابلون سمر وطلال في طريقهم لرياض ؟


    اذا شفت تفاعل راح انزل البارت الثاني الروايه كثيرر مشوقه وممتعه لا تفوتكم






  2. #2
    SONO
    SONO غير متواجد حاليا عضو جديد
    تاريخ التسجيل
    Sep 2009
    الردود
    2
    السلام عليكم ورحمة الله وبركاته

    انا اشتركت في المنتدى علشانج ولان قصتج مبين عليها حلوه
    فرجاءا لا تفشليني وبليز كملي القصة لاني ناطرتج

    وعساج على القوه انشاالله

  3. #3
    SONO
    SONO غير متواجد حاليا عضو جديد
    تاريخ التسجيل
    Sep 2009
    الردود
    2
    السلام عليكم

    وينكم يا عرب احنا ناطريكم ياهو ياهو

    ج_____________ا ري الانتظاررر

  4. #4
    راجل وست ستات
    راجل وست ستات غير متواجد حاليا عضو روعه
    تاريخ التسجيل
    Mar 2009
    الدولة
    في المكان اللي هناك
    الردود
    502


Content Relevant URLs by vBSEO ©2011, Crawlability, Inc.