رواية دنياي دنياكــ مهما أفترقنا!** لعشاق الرواية السعودية..

رجفة خفوق · #1 03/03/2009, 10:40 PM

رواية دنياي دنياكــ مهما أفترقنا!** لعشاق الرواية السعودية..

- -

افترقنا , الرواية , السعودية , دنياك , دنياي , رواية , لعشاق , مهما

رواية دنياي دنياكــ مهما أفترقنا!** لعشاق الرواية السعودية..

--------------------------------------------------------------------------------

سلااااام ع الجميع...

هذي اول مشاركه لي بالمنتدى واتمنى ماتخذلوني..

ابي اشوف تفاعلكم ...

رواية"{دنياي دنياك مهما أفترقنا}
**_________________________**

للكاتبه :سحابة شوق.
ــــــــــــــــــــ,,

شفتها بأحد المنتديات وأعجبتني فحبيت انقلها لكم وانشاء الله تعجبكــم..

بدخل بالموضوع طوااالي.

أولاً أحب أقول لكم اني بأذكر الشخصيات المهمه في القصه والباقي بيبينون بوسط القصه,,
*** ***

من الدمام"
عائلة أبو خالد(فهد)وأم خالد(حصه) وعيالهم:
خالد عمره(29)سنه متزوج بنت عمه"اللي من الرياض(تغريد)"وموضف في شركة أبوه.
محمد عمره(27)سنه موضف في شركة ابوه بعد.
تركي عمره(19)سنه يدرس ثالث ثانوي.
بشاير عمرها(18)سنه في ثاني ثانوي.
شهدعمرها(14)سنه في ثاني متوسط آخرالعنقود ودلوعةالبيت.
ـــــــــــــ
من الرياض"
عائلة أبو سلطان(حسن) أم سلطان(نوره) وعيالهم:
سلطان عمره(28)سنه موضف في شركة أبوه وعمه ابو عبد الله وهو صديق محمد ولد عمه الروح بالروح.
عبد العزيز عمره(22)سنه آخر سنه في الجامعه "قانون".
خلود عمرها(17)سنه في ثاني ثانوي البنت الوحيده طيبه وحبوبه .
وفيصل اخر العنقود عمره(7)سنوات.
ـــــــــــــ
عائلةأبوعبدالله(بندر) أم عبد الله (عبير) وعياله:
عبد الله عمره(23)سنه موضف في الشركه مع ابوه وعمه ابو سلطان.
تغريد أكبر منه عمرها(26)سنه متزوجه خالد ولد عمها وساكنه عندهم بالدمام.
ساره عمرها(19)سنه في ثالث ثانوي, هي وبنات عمها خلود وبشاير دايما مع بعض كنهم خوات.
ـــــــــــــــــــــــــ ــــــــــــــــ
ــــــــــــــــ نبدأ القصه وأنشاء الله تعجب الجميع ـــــــــــــــــــــ
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ــ
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ــ
(الفصل الأول)

...انا مااني حلم عابر حلمته وتبغى تفسيره.,.,.
...انا قصة هوى بصبر على قلبك وتقصيرك.,.,.
---
أم سلطان:خلود يمه يالله قومي الساعه 1,5 قومي صلي الظهر فاتتك الصلاة , كم مره أقولك لاتسهرين على هالنت.
خلود تحت الفراش:انشاء الله يمه بس شوي والله أمس مانمت الامتأخره.
أم سلطان:يالله بس بسك نوم طول النهار .
خلود: أنشاء الله يمه هذاني قمت.
أم سلطان: عفيه.
قامت خلود وخذت لها شاور ع السريع وبدلت ونزلت تأكل لها شيء .

بيت بو خالد بالدمام"
ع الغدا الساعه 2,5:
بشاير يبه.
أبو خالد: سمي.
بشاير:سم الله عدوك أقول مادام فيه اجازه الخميس والجمعه وش رايك نروح لعماني في الرياض لنا شهور عنهم.
شهد: ايه بابي تكفى أشتقت لجمعات عماني والاستراحه وساعة الصدر.
تركي: أيه والله من زمان عن العيال وعن الطلعات وياهم.
أبوخالد: خلاص خلاص كلتوني تجهزو اول ماتطلعون الاربعاء بنمشي الرياض وانا بقول لخالد وتغريد يجون معنا.
بشاير:هيييييه الله يخليك لي يابابي.
شهدوتركي:آمين.

يوم الثلاثاء في بيت أبوعبد الله بالرياض"
أبوعبدالله:جهزتو كل شيء ورتبتو غرفة اخوي وعياله.
أم عبدالله: ايه تطمن , وحشتني تغريد بنتي من زمان عنها.
أبوعبدالله: هذي هي جتك وبتقعد عندك ثلاثة أيام بتشبعين منها.
أم عبدالله: أنشاء الله.

بيت أبو خالد بالدمام"
بشاير:تركي متى بترتب اغراضك بكره السفر وأنت باارد.
تركي:أرتبهم بكره لمن اطلع من المدرسه.
بشاير:يابرد أعصاابك.,الامحمد ماأنت رايح معنا.
محمد: لا مااتوقع.
بشاير: ليش.
محمد:ماراح نروح كلنا ونخلي الشركه كذا.
بشاير:خالد بيروح يعني.
محمد:اكيد.
بشاير:عن اذنكم طيب بروح أرتب أغراضي سي يو.
محمد وتركي: سي يو
"يوم الاربعاء موعد الرحله بعد صلاة العصر مشو وع المغرب وصلو لبيت أبو عبد الله":
أبو عبد الله:هلا والله وغلا تو مانورت الرياض ياأخوي.
أبوخالد:منوره باهلها يااخوي.
أبو عبدالله:تفضلو ادخلو ارتاحو بعد السفر خذو راحتكم البيت بيتكم.
أبوخالد:ماتقصر ياأخوي.

وع العشاء كان ابو عبدالله عازم اخوه ابوسلطان ع العشاءوابوخالد قاعد عند اخوه ابوعبد الله بحكم انه اكبرهم.
<البنات بشاير وخلود أتفقو ينومون عند ساره بنت عمهم ابو عبد الله هي وأختها تغريد وقضو الليله سوالف وساعة صدر وبعدين الكل راح بيته>

"يوم الخميس في بيت ابو عبد الله"
البنات مانامو الا ع الفجروأذن الظهر ماقامو.
أم عبد الله تطق عليهم:يالله يابنات قومو صلو وكافي نوم .
تغريد كانت صاحيه:انشاء الله يمه خلاص.
ساره:يوووه والله امس سهرانه وابي انااام.
تغريد:أقول قومي وبلا كلام فاضي نسيتي اليوم بنطلع استراحه عمي حسن(ابو سلطان).
ساره:بس الاستراحه بالليل مو الظهر.
تغريد:على ماتقومين تصلين وتتغدين الامذن العصر يالله بس.
بشاير وخلود قامو منهم:خير وش فيكم من الصبح مناقر.
تغريد:يالله قوموصلو الضهر كافي نوم وترا اليوم بنطلع الاستراحه.
بشاير وخلود:وناااسه اليوم بنطلع الاستراحه.
<قامو البنات صلو وتغدو وقعدو سواليف لين العصر>
بشاير:بنات ماودكم نقوم نلبس يالله يمدي الحين يأذن.
خلود:ايه يالله قومو.., الاوين تغريد.
ساره:تصلح مع امي سلطه بتلخذها معنا الاستراحه, يالله بنات قومو غرفتي نلبس.
قامو يلبسون:
ساره لبست بنطلون برمودا سماوي وبلوزه لحد نص الفخذ تفاحي فيها كتابات سماوي واكمامها كت ورابطه نص الشعر ومخليه الباقي , وبشاير لبست بنطلون ماسك برمودا بيج مع بلوزه لحد الركبه
بني فيها ورود بيج وفاكه شعرها لحد نص ظهرها ومدرج.
خلود لبست بنطلون جنز كحلي مع بدي ليموني اكمامه كت ورابطه شعرها الطويل لنص الفخذ.
طلعو الاستراحه وجو العيال كلهم والرجال وكان فيه قسم خاص بالرجال وقسم للحريم بعد.
طلعو وجابو معهم اشرطه وأستريو وكانو متفقين ينامون هناك كل العائله لان الاستراحه مجهزه للعائله كلها

رقصو البنات وأستانسو وماناموالا ع الساعه 4,5 الفجر وماقامو من بكره الا ع الساعه 2,5 الضهر على تقويم اهلهم
عشان عائلة ابو خالد بيرجعون الدمام عشان الدوامات.

هالمره باكتفي بكذاا واذا شفت ردووودكم وتفاعلكم بحط اجزاء اكثر اوكي ,, وترا الاجزاء الثانيه احلااا واحلاااا....

انتظر ردوووووووودكم.......,

دمتم بود...

المواضيع المتشابهه:

منتديات فراشة حواء - للبنات للنساء للفتيات بنوتات - قصص بنات - القصص و الروايات قصة + رواية

~ورود المحبة~ · #2 04/03/2009, 07:47 AM

- - مشكوره اختي الراوايه الرائعه ..

انتظر التكمله...

رجفة خفوق · #3 04/03/2009, 03:01 PM

- - تسلمين يالغلا ماتقصرين ومن عيوني انزل لك الحين جزئين لعيونك ...

وابي اشوف تعليقك عليه

(الفصل الثاني)
>> بعـدك <<
طـفل ماله وطن ؟؟
ماقد فـرح ولا حضن
أمـه ونام بحضنـها .. ماقـد دفــا في صدرها
حرمــانـه يكفــي هالبشــــر !
من كثر ما قلبه إنكسر !
()()()
يوم السبت كان باقي على الامتحانات اسبوعين بس والايام هذي ايام المراجعه والكل شاد حيله.
بيت أبو خالد بالدمام"
أبوخالد: ها ياعيال كيف المذاكره معكم عسى شادين الحيل ابيكم ترفعون راسي عند الناس.
بشاير: ماشي الحال يبه بس لسا فيه مواد ماخلصتها.
أبوخالد: الله يوفقك,, وأنت ياتركي.
تركي:أنا وشو.
أبوخالد:ناسي انك في ثالث ثانوي ولازم تجيب نسبه عاليه.
تركي:مانسيت وابشر يابو خالد باللي يرفع راسك انشاء الله.
أبوخالد:انشاء الله نشوف.
أم خالد:الله يوفقكم ياعيالي.
تركي وبشاير :امين .
<مرت الاسبوعين بسرعه والايام هذي ايام امتحانات والكل يذاكر وشاد حيله عشان يجيب نسبه حلوه خصوصا اكثرهم في ثالث وثاني ثنوي >
بيت خالد وتغريد حيث الدفء والهدوء والاجواء بعيده عن الامتحانات في الدمام"
تغريد تقوم خالد بعد الظهر:خالد خلودي خلّودي.
خالد:هاه خير وش تبين.
تغريد مستغربه لهجته:يالله حبيبي قوم عشان نتغدا ترا ميته جوع وابغا اتغدا معك.
خالد:يووووه مااشتهي يالله بس قومي عني خليني انوووم.
<طلعت تغريد وهي زعلانه وفي نفس الوقت مصدومه من لهجت خالد وجفاه معها جلست عند التي في تتابع مسلسل>
تغريد غرقانه في متابعة المسلسل حست بواحد واقف وراها ويغمض عيونها,!!
تغريد:واااااااااااي .
خالد:ههههههههه خوفتك.
تغريد زعلانه وماترد:.......
خالد:للحين الحلو زعلان.
تغريد:يعني ماتدري وش سويت ليش تكلمني بهالطريقه.
خالد:لا عاد ماأقدر اصبر على زعلك والله اسف ياقلبي بس كنت تعبان شوي .
تغريد:.......
خالد:غرودي عمري.
تغريد:نعم اف منك.
خالد:افاااا اذا الحلو زعلان بأيش اراضيه.
تغريد: ماابي شيء منك.
خالد(جا وباسها مع خدها).
تغريد وجهها محمر :.....
خالد:للحين زعلانه.
تغريد:الله لايحرمني منك يابعد عمري ياخلودي.
خالد:ولامنك ياكل دنيتي.
بيت أبوسلطان في الرياض"
أم سلطان تطق الباب على بنتها خلود: طق طق طق.
خلود:تفضلي يمه.
أم سلطان:هايابنيتي وشلون مذاكرتك.
خلود :ماشي الحال أدعيلي يمه.
أم سلطان:الله يوفقك يابنيتي وتجيبين النسبه اللي ترفع الراس., هذي ساندوتشات عشان تساعدك ع المذاكره وكوب حليب لاتقولين مابي.
خلود:مشكووره يمه والله ان ريقي نشف من المذاكره.
أم سلطان:خلاص اجل كليها كلها وأشربي الحليب وأنا بنزل اشوف ابوك اذا يبي عشاء احطه له.
خلود:مرسي مام.
أم سلطان:يالله عن أذنك.
خلود:اذنك معك يمه.
<خلصت خلود اكل ونزلت تنزل الصحون ولقت اخوها عبد العزيز بالصاله>:
خلود:هايmybrother
عبد العزيز:هلا خلوده.
خلود:ياخي الناس مذاكره وامتحانات وانت قاعد تتابع لك فلم .
عبد العزيز:وسعي صدرك بكره عنديoff.
خلود:ياحضك يالدووب أناعندي مادتين وانت off.
عبدالعزيز:ههههه روحي ذاكري ياحلوه.
ويدخل عليهم سلطان:السلام عليكم.
خلود وعبد العزيز:وعليكم.
سلطان :كيف المذاكره معك ياخلود.
خلود:الحمد لله زينه الله يوفق انشاء الله.
سلطان :امين الله يوفق.
عبد العزيز يستهبل:تراحتى انا امتحن ولاتقولون تبي شيء محتاج شيء كلشيء عندكم خلود.
خلود:لاياشيخ ,تغااار.
سلطان :انت ماعليك خوف ماشاء الله أخرسنه جامعه وخلود في ثالث ثانوي يعني لازم تجيب نسبه حلوه.
يدخل عليهم فصولي الصغير:سلطاني جا هييييه وين الحلاوه حقي.
سلطان:يوووه والله نسيت حبيبي المره الجايه اجيب لك كرتون.
فيصل بخيبة امل:لاانت قلت بجيب لك.
سلطان :بس نسيت المره الثانيه اوعدك.
فيصل:خلاص لاتنسى.
سلطان :انشاء الله عمي.
<مرت ايام الامتحانات ثقيله ع الطلاب واليوم يوم السبت يعني باقي ثلاث ايام ع النتيجه لانها بتطلع الاربعاء>
بيت أبو عبدالله"
ساره:والله اني خايفه من النتيجه.
عبد الله:انتي كنتي شاده حيلك وانشاء الله بتنجحين ليش الخوف.

ساره: مدري الله يسمع منك.
دخل عليهم ابو عبد الله:السلام عليكم.
ساره وعبد الله:وعليكم السلام.
أبو عبد الله: هاياساره متى تطلع النتيجه.؟
ساره:يوم الاربعاء يبه.
ابوعبدالله:الله يوفقك يابنتي.
ساره:امين يبه.
في الدمام بيت ابو خالد بعد المغرب ع القهوه"
أم خالد:ماراح نروح الرياض بهالعطله يابو خالد.؟
ابوخالد:الاانشاء الله بس خلي العيال يستلمون النتايج اول بعدين بنمشي.
أم خالد:والشركه من بيقعد يديرها.؟
أبوخالد:بتناوب عليها انا والعيال وفيه واحد مساعدي ثقه.
أم خالد:طيب الله يوفق.
أبو خالد:الا وين شهد ماشفتها اليوم.؟
شهد نازله مع الدرج:هذاني يالغالي.
أبوخالد:هلا والله بشهوده وينك يبه من زمان عنك.
تدخل عليهم بشاير:ايه الحب كله لشهد وبس وأنا ياغافلين لكم الله.
أبو خالد:انتي الغلا كله بعد بس شهد الصغيره ولاكلكم غالين علي والله لايحرمني من شوفتكم عندي.
شهد وبشاير:ويخليك لنا يبه.
<يوم الاربعاء طلعت النتايج وكان الكل ناجح الحمد لله:
عبد العزيز تخرج من الجامعه وناوي يفتح له مكتب محاماة بحكم ان تخصصه هو قانون.
تركي تخرج من الثانوي بنسبة 98% وبشاير من ثاني ثانوي بنسبة96% وخلود بعد من ثاني بنسبة99% وساره تخرجت من الثانوي بنسبة 98% ..
وبدأت العطله وريحو من هم انتضار النتيجه وابوخالد متفق مع عياله يروحون الرياض ويجلسون هناك شهر ونص بعدين بيسافرون العائله كلهم سوا أبو خالد وابو سلطان وابو عبد الله وخالد جلس هو وتغريد بيجون الرياض بعد اسبوعين عشان الشركه
وصلو عائلة ابوخالد للرياض وكان ابو عبد الله مسوي حفلة تخرج لعيال العائله كلهم في الاستراحه وعازمين عليها الاهل والجيران والصديقات والكل حضرها واستانس.
البنات كانو لابسين:
بشاير لابسه فستان قصير تحت الركبه فوشي بدون اكمام(كت)وفاكه شعرها كيرلي وحاطه بلاشر وجلوس وطالعه نعووومه.
خلود لابسه تنوره لحد نص الساق بيضاء فيها ورود كثير وصغيره لونهم زهر ولابسه معها بدي زهر عليه جكيت نص ابيض جنز وحاطه جلوس ومسيحه شعرها وطالعه قمر.
ساره كانت لابسه تيور حرير رصاصي غامق مع بدي لف رصاصي وبني ومجعده شعرها وطالعه كيوت مع مكياج خفييف بنوتي.
العزيمه فيها بوفيه كبير للعشاء وجايبين صبابات ومسوين قصيده باسماء البنات كلهم ورقصو بعدها وأستانسو .
من جهة الرجال:
تركي:والله ياخي ماحسيت باني متخرج البنات جوا فالينها رقص ووناسه وأنا ولا شيء مغير مقابلين هالرجاجيل طالع وداخل.
عبد العزيز:أحمد ربك ان عمي مسوي لك حفله انت مع هالخشه بعد.
محمد :عسى ماشر يابو الشباب أنت وياه.
عبد العزيز:طالع اخوك يغار من البنات.
محمد:خخخ ماعليك منه.
تركي:أنا بقول لبشاير تجيب لنا المسجل اذا راحو الضيوف بالليل.
عبد العزيز:طالع وش قاعد يقول الولد أنهبل وش تبي الشياب يقولون عنا .
تركي:وش بيدريهم.
<عند البنات ريم صديقة خلود حضرت معهم وأستانست مع البنات وع الساعه 12راحو كل المعازيم ونامو الاهل وماباقي الا البنات والعيال للحين صاحين>
تركي :ياخي يالله عاد نامو الشياب ابي ارقص خلونا نستانس.
عبد العزيز:وأنا وش علي منك.
تركي :ياخي افهمها انت.
عبد العزيز:وش اللي افهمها لايكون تبيني اطق لك.
تركي:لا تكفى بطلت,بس مو خلود أختك اللي جايبه المسجل.
عبد العزيز يستهبل عليه:اهاا قصدك اقول لخلودأختي تجيب لك المسجل بصفتك ايش.
تركي:بصفتي ولد عمها وابي منها المسجل عشان نستانس شوي.
عبد العزيز :طيب لحظه أتصل عليها.
تركي:يعيش ابو العز ولد عمي.
عبد العزيز:هذولي اهل المصالح طلعوا.
تركي:أفا عليك بس طول عمري امدحك.
أتصل عبد العزيز على خلود وكان حاط ع السبيكر:
خلود:هلا والله بهالصوت.
عبد العزيز:هلا بك.
خلود:وش بغيت .
عبد العزيز:بصراحه مو انا اللي ابي منك تركي ولد عمي يبيك ,
<خلود مجرد ماسمعت ان تركي عند عبد العزيز لاويبيها وهي طايره ,,(خلود تحب تركي من زمان بس مغبيه بقلبها ولاقالت لحد حتى تركي نفسه مايدري عنها مشكلة الحب من طرف واحد)>
تركي يأشر لعبد العزيز يقول لها هو .
عبد العزيز:وأنا وش دخلني بعد تبي اختي تقول اخوي انهبل يبي يرقص لا قل لها انت راعي الحاجه.
تركي: طيب كليتني بقشوري عطني الجوال طيب.
خلود:الوو الو عزوزي وين غفلت.
تركي:الو هلا خلود اناتركي.
خلود اول ماسمعت صوته تلعثمت:الو هلا مين تركي.
تركي:ايه وش اخبارك خلود ومبروك النجاح.
خلود :الله يبارك فيك , وانت بعد مبروك التخرج عقبال الجامعه انشاء الله.
تركي:انشاء الله.
خلود في نفسها(يالله عبد العزيز يقول يبي مني شيء وشو ياترى).
تركي:الو خلود .
خلود:هلا.
تركي منحرج منها:سمعت انك جايبه معك المسجل صحيح.
خلود:ايه ايه معي ليش.
تركي :لابس عبد العزيز اخوك وده يرقص ومستحي يطلبه منك وقالي قلها انت ياتركي.
عبد العزيز عندها يصارخ:كذاااااب والله كذاااااب هو اللي يبيه.
تركي يضحك:هههههههههه.
خلود في نفسهايالبى ذالضحكه ليتك تدري عني ياتركي).
خلود:خلاص خلاص انا بطلعه لكم وخل احد يجي ياخذه ياتركي.
تركي :مشكوووووره يابنت عمي ماتقصرين وبروح عبد الله يجيبه.
خلود k باي.
تركي:بايات.
<خلود للحين مو مستوعبه اللي صار ,تركي بنفسه يكلمني أآآه ياتركي امووت فيك وليتك تدري عني >.
ساره:خلووود خلووده هيي.
خلود:ها نعم ساره.
ساره:لا البنت مو معانا من كنتي تكلمين قبل شوي.
خلود:ايه صح ساره خذي المسجل وطلعيه برا عبدالله اخوك بيجي الحين ياخذه للعيال يبونه.
ساره:هههههههه انهبلو شكلهم.
خلود:ههههههه والله ماادري عنهم بس طلعيه لهم.
سارهk.
عند العيال:
عبدالله:وانت من قالك اني بجيبه.
تركي:مو انت اللي مقترح اننا نجيب المسجل عشان نرقص انا كلمت وانت قوم جبه منهم .
عبدالله:آسف والله مشوااار اروح امشي لين مبنى الحريم.
تركي:خلاص ياجدي انا بروح اجيبه منهم.
<خذت ساره المسجل وراحت توديه للباب عشان يجي عبد الله اخوها ياخذه منها هذا اللي هي حسبته>
دخل عليها تركي بصالة الاستقبال وهي معطيته ظهرها.
تركي:هابشوره هذا المسجل هنا بس الاشرطه وينها.
ساره مو مستوعبه وتلف عليه ولمن شافت انه تركي ترجع وتتغطا بالشال اللي رابطته عليها.
تركي لف على ورا:آسف والله على بالي بالي بشاير اختي.
ساره:هاه لا هذا المسجل والاشرطه معه بعد.(وطلعت من الصاله).
وتركي في حالة ذهول يشوفها ويقول معقوله هذي ساره بنت عمي بندركبرت واحلوت ولاعيونها المكحله تذبح آآه من جد تدخل القلب بسرعه.
أما ساره دخلت ع البنات وبالها مو معاها ومعصبه على خلود اللي حطتها بهالموقف.
خلود:ها عطيتي عبد الله المسجل.
ساره:....
خلود:ساره ساره سارونه.
ساره:هاه ايه لا.
خلود:وش اللي ايه لا.
ساره في نفسها(بلاك ماشفتي اللي شفته واحد طول وعرض ولابس شماغ وحاط السكسوكه ياي يهبل,, وش ذا ياساره شكلك انهبلتي وش ذا الخرابيط).
خلود:ساره وش فيك .
ساره:عطيت المسجل تركي شافني كنت فاتشه على بالي عبد الله اخوي انتي قلتي لي ان عبد الله اللي بيجي.
خلود انصدمت:وشو شافك كيف وش قالك وانتي وش قلتي له.
بشاير :شوي شوي ع البنت ياخلود كلتيها.
خلود:اسفه ساره بس كيف شافك.
ساره : كنت بالصاله ودخل علي على باله اني بشاير وتغطيت بس عقب ايش.
بشاير:ههههههه عز الله أخوي بيروح فيها مع هالزين كله.
ساره:وش هالخرابيط بعدين ماشافني زين اصلا.
بشاير :تركي اخوي يقز قز ماشاء الله.
ساره:ههههههه ماأظن.
بشاير:خلوده وش فيك ساكته.
خلود:ها لا مافيني شيء بس ودي اروح انام.
ساره:تنومين الحين حشا اجلسي معنا شوي ولا مليتي.
خلود:لاوالله بس راسي مصدع من الرقص عن اذنكم.
ساره وبشاير :اذنك معك.
بشاير:ماتحسين ان خلود فيها شيء.
ساره:والله ماادري بس ياخبراليوم بفلوس بكره ببلاش.
بشاير:صادقه.
<مرت أسبوعين ع الحادثه وجا خالد هو وتغريد للرياض والعائله كلهم كانو مجتمعين بالستراحه طول العطله >
.*تركي ماغابت عن باله ساره ولا لحظه بعد ماشافها ووده يسأل بشاير اخته عنها بس مايدري كيف*.
ـــ
محمد اليوم ناوي هو والعيال يلعبون كوره ومحمد كان احسنهم لعب.طلعو لملعب الاستراحه والبنات يوم درو عنهم طلعو يتفرجون عليهم.
لعبو فريقين وشات محمد الكوره وجاب هدف ولمن شاتها عبد الله من الفريق الثاني راحت بعيد وصقعت براس بشاير:
بشاير:آآخ راسي.
عبد الله قرب عندهم:آسف يابنت عمي ماكنت أدري.
بشاير:آآخ لاعادي صار خير.
عبد الله في نفسه:آآآخ معقوله هذي بشاير عيونها المكحله تخلي الواحد مايوخر عينه منها.
خذا الكوره ورجع للعيال وباله مع بشاير أعجبته في كل شيء زي مايقولون (حب من اول نظره).
خلصت المباراة تعادل 1ـ1.
في مجلس الرجال العيال مجتمعين:
تركي وده يكلم اخوه محمد عن ساره لانه مايغبي عنه شيء بس مو عارف وش يقوله وكيف يبدا.
محمد:تركي وش رايك نطلع شوي نتمشا.
طلعو برا في الحوش.
تركي:هلا محمد وش بغيت.
محمد:ودي اكلمك في موضوع.
تركي:وشو اسمعك.
محمد:والله انا ماادري وش اقول بس بصراحه انا شفت ساره بنت عمي وعجبتني وودي انك تكلم بشاير عنها لانك اقرب لها مني.
<تركي مصدوم بمشاعر اخوه تجاه نفس البنت اللي هو يحبها>.
تركي:ياهوه طلعت تحب,طيب وش المطلوب يعني تبيني اكلم بشاير تسألها.
محمد:ايووه بالضبط الحين خذها تمشى معاها وجب هالموضوع خلها تجس نبض ساره يعني.
تركي:طيب اشوف الليله.
محمد:مشكوور ياخوي.
تركي:ماسويت شيء.
<تركي حس انه المفروض يغير مشاعره تجاه ساره لانه فكر فيها ماتصلحله اولا السن وبعد اخوه يحبها وصارحه بهالشيء مايصلح والحمد لله قدر يغيرها وحاول لانه ماتوصل للحب كان مجرد اعجاب لحد الحب>

رجفة خفوق · #4 04/03/2009, 03:01 PM

- - (الفصل الثالث)
شوف غيري حتى لو قلبي يبيك ..
شوف غيري انا ما انفع معاك ..
انت تلقى من يحس ويشتريك ..
وانا بالقى من ينسيني هواك ..
+++++++++++
أتصل تركي على بشاير من بكره وقال لها تطلع يبيها في موضوع.
بشاير:احلاا والله يامحمد طلعت عاشق طيب ليه ماكلمني هو.
تركي:يقول اني اقرب لك منه.
بشايرkخلاص قله رح احاول اسألها وأقول له وبعدين ابو حميد مايعيبه شيء أخوي.
بعد الغدا:
محمد:ماكلمتك بشاير.
تركي:أشوفك تسأل عنها هاليومين.
محمد:أختي .
تركي:أختك ولا صديقة زوجة المستقبل.
دخل عليهم سلطان:منهو ذاللي بيتزوج.
تركي:قيس بن فهد(يقصد محمد اخوه)
سلطان يضحك عليه:هههههه حلوه ذي قيس بن فهد ومنهي تعيسه أقصد سعيدة الحظ.
محمد:ماراح أقولك عشان تعرف منهي تعيسة الحظ على قولتك.
سلطان:أفا انا ولد عمك وصديقك وماتقولي.
تركي:أنا أقولك.
سلطان بشغف:منهي تكفى.
تركي:ساره بنت عمي بندر.
سلطان:أحلاااا يابو حميد عرفت من تختار.
محمد:نعم وانت متى شفتها اصلا.
سلطان:ومن قال اني شفتها , بس اذكرها اول كانت ماشاء الله جمال ودلال.
محمد:ايه اشوا.
تركي:الرجال شكله يغار هههههه.
سلطان: هههههه من الحين بدينا يابو حميد.
دخل عليهم عبد الله اخو ساره وغيروالسالفه.
عند الحريم:
أم خالد:ماشاء الله ساره وخلود صارو عرايس.
أم عبد الله:ايه خلاص عاد نبي نزوجهم.

البنات أستحو من الحريم وكلامهم عنهم.
خلود:وش رايكم أسوي لكم كيكه تراي اعرف.
أم سلطان: عاد خلود والكيكه قصه ماتخلص.
أم عبدالله :ماعليك هذي الحرمه السنعه.
أم سلطان:عاد والله مشتهيه نفس الكيكه اللي سويتي هذاك اليوم لنا.
خلود:من عيوني.
أم سلطان :تسلم عيونك.
خلود:يالله بنات ماودكم تساعدوني.
ساره:لاتكفين أنا اكره الطبخ.
بشاير:وانا والله بعد بس لوتبين اشرف عليك ياشيفه خلود.
خلود:لا مشكوره يالسنعه مابي منكم شيء بس لااشوف وجيهكم في المطبخ.
بشاير وساره:ماطلبتي شيء ,, بس عاد نبي ناكل من الكيكه.
خلود:لاتخافين هههههه .
وراحت خلود تسوي الكيكه.
بشاير أستغلت غياب خلود:
بشاير:وش رايك سارونه نطلع نتمشى برا.
ساره:يالله فكره حلوه الجو رايق.
<وهم يتمشون>
بشاير:ساره ابسألك سؤال وتجاوبيني بصراحه.
ساره متخوفه من السؤال:تفضلي ,وانتي ماناديتيني وخلود مشغوله الا ان فيه شيء.
بشاير:انتس قد مرت عليك تجربة حب او في بالك واحد.؟
ساره مستغربه السؤال:انتي عارفه يابشاير حنا بنات حمايل ماعندنا هالحركات.
بشاير:انا ماقلت كذا بس بسألك بصراحه وش رايك بمحمد اخوي.
ساره :محمد وليش يعني اش معنى.
بشاير:مجرد سؤال.
ساره:انتي ماسالتي عنه بالذات الافيه شيء خلصيني وقوليه قبل تجي خلود.
بشاير :طيب قولي رايك اول بصراحه وبعدين اقول لك سبب هالسؤال.
ساره مستحيه:بصراحه هو اخلاق ورجال والف بنت تتمناه.
بشاير:وانتي من هالالف.
ساره باستغراب:نعم.
بشاير:بصراحه ياساره محمد يحبك وقالي ماراح يتقدم الا لما يعرف رايك انتي بالاول.
ساره تفاجأت:محمد يحبني انا.
بشاير:ايه وش فيك تفاجأتي.
ساره:لابس انتي فاجأتيني صراحه.
بشاير:بس انتي مدحتيه يعني..؟
ساره محمر وجهها:اخوك ماينعاب يابشاير.
بشاير:يعني موافقه عليه.
ساره:اذا يبي شيء يكلم ابوي وهو اللي يقرر.
بشاير:يعني انتي موافقه.
ساره مبتسمه وخدودها محمره زياده:....
بشاير:ياعيني ع اللي يستحون.
ــــــــــــــــــ
باقي شهر ع العطله وتنتهي والعائله كلهم مع بعض بيسافرون مصر بيجلسون ثلاث اسابيع وبيرجعون عشان تقديم ساره وتركي ع الجامعه بيبدأبدري.
يوم السبت أقلعت الطائره من مطار الملك خالد الدولي وحطت ركابها في مصر وكانو حاجزين فندق سوا ثلاث اجنحه وخالد وتغريد مالقو حجز لهم فأخذو فندق قريب منهم.
أبو عبد الله:يالله اجل خلونا نروح نرتاح شوي عقب حوسة المطار وعلى العشاء نتقابل نتعشاء سوا.
أبوخالد:يالله أجل الوعد بالليل.
<وراحو يرتاحون عشان بالليل يطلعون يتعشون سوا حاجزين لهم في مطعم ,والبنات كانو فاتشين والامهات بالعكس مافتشوا>.
ع الساعه 7,5المغرب قامت ساره والبنات كانو نايمين سوا عندهم وقعدت تقومهم معها .
ساره:خلوده بشوره يالله قومو .
خلود وهي نعسانه:هااه وش عندك كم الساعه.
ساره:الساعه 7,5 خلوناننزل تحت ناكل لنا شيء على مايجي العشاء انا ميته جوع من الصبح على لحم بطني.
بشاير:وش عندكم صجه ابي انااام.
خلود:قومي ننزل مع ساره تحت الاخت جوعانه قومي قبل لاتفترسنا.
ساره:مالت يالله بس قوموووا.
<نزلو البنات وجلسو على طاوله وطلبو لهم شيء يشربونه وكان فيه شاب خليجي جالس عالطاوله اللي قبالهم وطبعا هم ماعطوه اي اهميه وجلسو سوالف وين بيطلعون اليوم ووش بيسوون>.
بشاير:بنات جاني بلوتوث من واحد اسمه (سعودي وكلي فخر).
خلود:أستقبلي طيب شكله خليجي.
شاير:أستقبلت.
<فتحته بشاير ولقته حاط بيت شعر ورقم جواله>
بشاير:وش قالو له حاط رقم جواله اللي مايستحي يبيني ادق عليه.
ساره:لاتردين عليه.
خلود:بنات مين تتوقعون يكون من اللي هنا.
بشاير:لحظه بسأله.
ساره:ايه يالله.
بشاير:يقول أنا لابس جنز كحلي مع تي شيرت أبيض وكاب كحلي.
خلود شهقت:هيييييييي.
ساره متخرعه:وش فييك.
خلود:هذا هو اللي جالس قدامنا ع الطاوله نفس المواصفات قليل الادب.
شافت ساره وبشاير الولد لقوه قاعد يناضرهم ويبتسم.!!
قام الولد وجاهم وهم جالسين ع الطاوله!!!..؟
الولد :هااي ممكن أسألكم سؤال .
بشاير حمقانه عليه:خير انت ومن تكون عشان تكلمنا بهالطريقه وتجي عندنا.
الولد:هدي أعصابك يامدام.
بشاير عصبت:مدام في عينك ياقليل الادب.
خلود:وش اللي تهدي انت ماعنك غيره على بنت بلدك.
الولد:انا قلت هالجمال جمال خليجيات.
ساره عصبت وفار دمها:أحترم نفسك ياقليل الادب .
الولد ببرود:لاعاد ماتوقعتها منك بس تصدقين عاد انتي احلى وحده فيهم.
<على طقاقهم ذا نزلو العيال يبون يمرون خالد في شقته ويطلعون سوا >.
سلطان:مو هذولي البنات هذي خلود اختي معهم.
محمد :الاوالله هم.
سلطان:ومن هالولد اللي معهمطيب.
عبد الله:خلوكم هنا بروح اشوف وش السالفه وارجع.
:
الولد :أي وحده فيكم بشاير.
بشاير: وانت وش عليك وخر من هنا لأنادي الامن يسحبونك.
عبدالله:خير أنشاء الله وش صاير ومنو انت.
الولد باستهتار: انت اللي منو عشان تسألني.
عبدالله عصب من كلامه:انت منو عشان تتجرأعلى أختي وبنات عمي.
الولد مصدوووم لمن درا عنه:.......
عبد الله:ماتقول لي وش عندك هنا.
ساره:هذاواحد جاي مايستحي على وجهه.
عبد الله عصب:بتنقلع من هنا ولا اوريك كيف الشغل.
الولد خايف منه وش بيسوي به:لا أستريح ياخي ماله داعي المشاكل انا طالع.
عبد الله:ياجبان خلني اشوف وجهك في هالمكان مره ثانيه فاهم.
عبد الله يلف ع البنات:بشاير.
بشاير مستغربه منه: هلا عبد الله.
عبد الله:وش كان يبي منكم.
ساره:قل أدبه معنا.
عبد الله معصب:أنا سألت بشاير لان شكله كان يقصدها هي.
بشايرخافت من عصبيته:لابس لاني انا اللي استقبلت بلوتوث منه بس ماتوقعت السالفه توصل لهالشيء.
عبد الله:ع العموم حصل خير بس لاتنزلون لحالكم مره ثانيه.
بشاير:انشاء الله.

بيآدر^الحربي · #5 04/03/2009, 04:59 PM

- - واااااااااااااااااووووو.... ........... تكــــــــــــــــــفين أبغى القصـــــــــــهـ.,......كااا اااااامله

بيآدر^الحربي · #6 04/03/2009, 05:03 PM

- - انتظرهااااااااا

رجفة خفوق · #7 05/03/2009, 01:03 AM

- - فديتكــ انتي اللي متفاعلــهـ معــاي ومتابعتنــي ..!!

ولعيونك يالغلا بكملها ...

(الفصل الرابع)
تنقيتك ما بين الناس نقوة :: نزعتك ثم غرستك في كياني .,.
تهاونت حسبت الحب نزوة:: أثاري أصبح الغاية بزماني.,.
----
مضت هالليله على خيرومن بكره طلعو للاهرامات الصباح وتغدو في مطعم سوا كلهم ورجعو للفندق لاكن خالد كان عازم تغريد في كوفي راقي بمناسبة ذكرى زواجهم الثالثه,
تغريد وخالد لهم ثلاث سنوات متزوجين بس مايجيهم عيال.
تغريد:خالد ممكن أعرف ليش جايبني هنا ماخليتني اروح مع اهلي الفندق.
خالد:كل شيء في وقته حلو .
جا الجرسون وحط الكيكه ع الطاوله والعصير وراح.
تغريد مستغربه:وش له كل هذا ,,خلودي حرام عليك حيرتني.
خالد:ماراح احيرك اكثر,ثلاث سنين مرت على زواجنا وكنت اسعد زوج بهالدنيا معك ياتغريد.
تغريد استحت وخنقتها العبره ونزلت دموعها غصب(طبعها حساس هالبنت).
تغريد:الله يخليك لي يااحلى زوج بهالدنيا.
خالد:تغريد.
تغريد:ياعيون تغريد.
خالد:أحبك.
تغريد حمر وجهها:وانا بعد.
خالد:انتي وشو.
تغريد فهمت قصده:أحبك.
خالد:الله لايحرمني منك.
تغريد:ولامنك يارب .
....
بعد اسبوع طلعو العائله راحو شرم الشيخ واعجبتهم وجلسو فيها اسبوع وأخر اسبوع راحو الغردقه وبعد أعجبتهم واليوم كانو طالعين في لنش كلهم كان العيال والنات وابو سلطان سوا.
وابو عبدالله . اما خالد وتغريد وابو خالد والامهات كلهم سوا في لنش ثاني مع عبد العزيز وشهد وفصولي الصغير.
محمد:عبد الله ماودك نمدد الجلسه هنا .
عبد الله :الاوالله الجلسه هنا ماتنمل بس مالنا غناة عن ديرتنا.<وهو اساسا قاعد يدور على بشاير من بين البنات>.
تركي:وش رايكم نرقص انا توي شاري شريط خطيييرللعنود.
محمد:الحمد لله والشكر حتى بالبحر تبي ترقص انت غريب صراحه.
تركي:ياخي وش فيها خل نستانس.ولالا يابنات.
ساره:الا يالله عبود ابي اشوف رقصك.
عبد الله:لا انا ماعندي هالحركات مخليها لتركي مايقصر.
محمد انبسط حيل لمن حكت ساره وهي كانت منحرجه منه لانه من ركبت وهو عينه عليها.

خلود:والله مشتهيه ارقص.
ساره:أختشي يابنت مايصحش.
بشاير:هذا وانا مالنا الا كم اسبوع اجل لو شهر وش بتسوين.
خلود:كان تنسى السعودي كله هههه.
بشاير وساره:ههههههههه.
عبد الله في نفسه:<يالبى هالضحكه ياناس ويلوموني في حب بشاير متى ارجع بس عشان اكلم ساره واسألها>.
محمد<آآه لو اقدر اسحبك من بينهم ياساره ونجلس ندردش سوا انا وانتي بس>.
تركي وهو يهز:اقوى شباب بنات صفقو خلونا نعرف نرقص .
خلود في نفسها:آآه يازينك ياتركي اموووت فيك .
تركي:بشاير جيبي لي كاس مويه عطشت.
بشاير:يووووه مشوار ياتركي عطيه تكفين ياخلود.
خلود مستغربه:هاه انشاء الله.
<خذت كاس مويه وعطته اياه>.
تركي وعينه بعينها:مشكووره ياخلود تصدقين بشاير اختي ماعمرهانفعتني بشيء.
خلود:حرام عليك بس يمكن عجزانه تجيب لك.
تركي :موهذاالبلا انها عجاازه.
تركي:الا وش رايك في رقصي.
خلود مو مستوعبه:نعم.
تركي:اقول وش رايك في رقصي.
خلود:ماشاء الله عليك ماأخبي عنك احسن من عبد العزيز اخوي.
تركي:ههههههه مشكووره ع المجامله.
خلود:لا والله ما أجامل .
تركي:مشكووره.
خلود:العفو.
<راحت خلود وتركي مانزل عينه منها وخذت عقله وقلبه آآه ياخلود احلويتي عن اول ولا عيونك الذباحه وخلود نفس الشيء تفكر فيه ولا واحد يدري عن الثاني>.
ساره:بشووره.
بشاير:هلا والله.
ساره:ماتلاحظين عبد الله اخوي من ركبنا وعينه عليك.
بشاير:وشقصدك وبعدين انا مو ملاحظه.
ساره:الا شكل الولد يعشق.
بشاير:يازينك ساكته.
ساره تكلم عبد الله:ياخي أكلت البنت بعيونك.
عبد الله منحرج:ها لابس قاعد اطالع ابوي مع امي يتذكرون ايام زمان وهم شباب.
ساره:اها حلوه بس ماراح تفوت علي.
خلصو من اللنش وبالليل في شقة ابو عبد الله.
عبد الله:ساره.
ساره:نعم.
عبد الله:بشاير بنت عمي بأي صف.
ساره:رايحه ثالث بس ليش.
عبد الله :لابس سؤال.
ساره :لاياشيخ من وأحنا في اللنش وانت عينك عليها قل لي وش فيك.
عبد الله:مافيني شي بنت عمي واسأل عنها.
ساره:ولو اني مو مقتنعه بس بمشيها لك.
بعد اسبوع انتهت الرحله ورجعو الرياض وقدم تركي وساره ع الجامعه وانتقبلو الحمد لله.
وبدا العام الدراسي الجديد والكل بدا بالجد.

رجفة خفوق · #8 05/03/2009, 01:05 AM

- - (الفصل الخامس)
(*)(*)(*)(*)
تعبت وغربتي طالت ..
وهمي عيا لا ينـــــــــــــزاح ..
كثيرهـ الناس من حولي
ولكن صعبه تتأثر..!!!
ولا فيهم احد حاول
يبدل حزني لأفراح..؟؟
ولا حاول يحس فيني
ويشعر مثــــل ما أشعر
أنا مرتاح اقول لكم وخلوووني انا مرتاااح.....
(*)(*)(*)(*)
بيت بو خالد بالمجلس:
خالد:يبه الله يخليك ماله داعي هالكلام انا وتغريد مرتاحين في حياتنا ومقتنعين بقسمة الله واننا مانجيب عيال.
ابو خالد:ولو ياخالد الشرع حلل لك اربع وتغريد انسانه فاهمه ولو صدق تحبك ماراح توقف في طريق سعادتك وبالمره اللي تجيب لك عيال.
خالد:انا سعادتي مع تغريد وبس مو مع حد ثاني غيرها.
ابو خالد:خلاص ياخالد انا خطبت لك بنت تاجر معنا في الشركه وبعد اسبوع الملكه.
خالد مصدووم من تصرف ابوه:وش اللي خطبت لي وانا وين كنت مالي شور بتغصبني يعني.
ابو خالد:انا ابوك وأعرف مصلحتك.
خالد:بس انا كبرت واعرف وين مصلحتي زين.
وطلع خالد وخلا ابوه وهو مصدوم من تصرف ابوه معه ووش يقول لتغريد ماله يد فيه وش يقدر يسوي.
أتصل خالد على محمد اخوه يمكن يقدر يساعده ويقنع ابوه.
محمد مصدوم:ومن متى هالموضوع .
خالد:اليوم كنت عند ابوي وقال لي.
محمد:وانت وش ناوي عليه.
خالد بيأس:ماأدري يامحمد والله تعبااان ليش ابوي يشوف ان سعادتي بأنه يتعسني آآآه ياتغريد لو تدري وش بتسوي.
محمد:بتقول لها.
خالد:لاا بس هي مصيرها تدير الحين ولا بعدين.
محمد:والله ودي اساعدك يااخوي بس ابوي خطب خلا ص .
خالد:وبعد الملكه بعد أسبوع.
محمد:الله ييسر امرك ويهدي ابوي.
خالد من قلب:آآآآآآآميييييين.
:::
ابوخالد يكلم ابو سلطان .
أبو سلطان:المفروض يااخوي انك ماضغطت ع الولد هو كبير ويعرف مصلحته زين.
ابو خالد:خالد مايدري وين مصلحته ولا كان تزوج من زمان عشان يجي له ضنا.

أبو سلطان:وبنت اخوي ابو عبد الله.
ابو خالد:بتقعد في بيتها معززه مكرمه ومحد بيقول لها شيء .
أبو سلطان:هي داريه.
ابوخالد:لا بس اكيد خالد بيقول لها وانا لقيت حولهم فله بشتريها لمرة خالد الجديده.
ابو سلطان:الله يكتب اللي فيه الخير.
أبو خالد:يالله اجل مااطول عليك وحبيت ابلغك الملكه هالخميس.
أبو سلطان: على خير انشاء الله.
::::
بيت بو عبد الله وساره تكلم تليفون.
ساره:كيف طيب يمكن نام عند واحد من ربعه.
تغريد شوي وتصيح:لا ياساره ماتوقع هو ماقد نام برا البيت.
ساره:تطمني تلقينه جاي بالطريق.
تغريد:الله يسمع منك.<وحبت تغير السالفه لانها اقلقت ساره معها>تغريد:الا وش اخبار الجامعه.
ساره:الحمد لله ماشين الله يعين ع الغثا.
تغريد سمعت صوت باب يفتح:امين,ساره يالله عن اذنك الضاهر هذا خالد جا اكلمك بعدينok.
ساره:الحمد لله يالله اجل باي.
تغريد:بايات.
سكرت تغريد من ساره.::
خالد:سلام.
تغريد:وعليكم السلام وين كنت اقلقتني عليك خلود.
خالد مهموم وماله خلق يكلم حد:مالك شغل مالي خلق شيء بروح انام لحد يصحيني.
تغريد مصدومه شكله مو طبيعي الرجال فيه شيء اكيد بس وين كان عشان يتعكر مزاجه بهالشكل:طيب أحط لك عشاء.
خالد:مابي شيء متعشي وبنام .
تغريد بدت توسوس جاي متأخر ومتعشي ويكلمني كذا وش السالفه:أنشاء الله.
××××
بيت بو خالد:
أم خالد:حرام عليك تغصب الولد على شيء مايبيه.
أبو خالد:أنا اعرف مصلحة ولدي زين ياام خالد.
أم خالد منقهره من تصرف رجلها وتدخله في حياة ولده:بس هو كبر ويعرف مصلحته زين.
أبو خالد:لو كان يعرف مصلحته كان من البدايه تزوج وجاله عيال هذا ولدي الكبير وابي اشوف عياله.
أم خالد عرفت ان مافيه امل وهي عارفه ان ابوخالد راسه يابس ولو يبي شيء بيسويه : الله يهديك يابو خالد.
أبو خالد:تصبحين على خير.
أم خالد:وانت من اهله.
""الله يعينك ياخالد على فعايل ابوك""
الصباح صحا خالد من النوم:غريبه محد صحاني تأخرت.
"قعد وشاف تغريد عند الtv,,
خالد:صباح الخير.
تغريد من غير نفس ومن غير ماتطالعه حتى:صباح النور.
خالد جا وجلس جنبها:للحين زعلانه.
تغريد:......
خالد:صدقيني ماكنت أقصد اضايقك بس كنت متضايق من موضوع وتعبان مالي خلق .
تغريد:.....
خالد:آآسف ياقلبي ماأقدر على زعل الحلوين عاد يالله .
تغريد أستحت:أسفك مقبول بس ممكن تقول لي وش اللي مضايقك ممكن اقدر اساعدك.
خالد تذكر السالفه وضاق خلقه وتعكر مزاجه"آآآه ليتك تقدرين تساعديني ابوي بيذبحني وهو على باله يسعدني":لا موضوع بالشغل وانشاء الله ينحل.
تغريد:اهاا انشاء الله الله يبعدك عن المشاكل .
خالد تنهد وحب يغير السالفه وحاول يبتسم:مافيه فطور اليوم ولا كيف.
تغريد:من عيوني الحين احط لك.
خالد:لا انا عازمك ع الفطور برا وش رايك.
تغريد:ماله داعي ياقلبي الفطور جاهز مسويته .
خالد سوا نفسه زعلان:تردين عزيمتي يعني.
تغريد:ماعاش من يردك ,دقايق واكون جاهزه.
خالد:الله لايحرمني منك يالغاليه.
تغريد:ولا منك.
""طلعو وافطرو وراحو الغدا على بيت ابو خالد""
أبوخالد:تعال ياخالد ابيك شوي بالمجلس.
خالد يناظر محمد كأنه يقول ساعدني وأقنع ابوي تكفى:انشاء الله.
محمد في نفسه "الله يهديك يايبه ويعينك ياخالد"
تركي:وش سالفتكم أنتم الحين.
محمد:ها بعدين تعرف مو وقته.
تركي:فيه موضوع وواضح ان فيكم شيء ومصير بعرفه .
""""
أبوخالد:ترى اليوم بنروح نملك وريح مافيه عرس ولاطقطقه عزيمة رجال كل هذا عشانك ياولدي.
خالد مصدوم"صدق انك عطوف يبه يعني الحين تكلفت يوم مانت حاط عرس آآآه لو تدرين ياتغريد كيف زوجك بيتعذب لحاله ":كيف!!! أسمح لي يبه انا من البدايه مو موافق.
أبو خالد عصب:وانا مااخذت شورك تملك يعني تملك .
خالد:يبه مافكرت في شعور تغريد وش بيكون موقفها من هالزواج.
ابو خالد:بتقعد في بيتها معززه مكرمه وماحد له اعتراض.
آآآآآآآآآآآآآآآآآآآآآآآآآ آآآآآآآآآآه ه صرخة تغريد في الصاله.
أم خالد:بسم الله عليك يابنيتي وش فيك.
تغريد وهي متعوره:اييي زلقت من الدرج كان فيه مويه اااييي,
بشاير مرتاعه:بسم الله عليك,, شهد روحي نادي خالد عشان يوديها المستشفى.
تغريد:لا مافيه شيء يستاهل.
أم خالد: الا خلينا نتطمن عليك يمه يمكن كسر الله يستر.
شهد:خالد الحق تغريد طاحت مع الدرج وشكلها متعوره حيل.
خالد متروع:وهي وينها الحين.
شهد:عند امي وبشاير بالصاله.
راح لهم خالد وشالها ووداها المستشفى.
خالد:ها دكتور طمني.
الدكتور:لاتطمن الحمد لله مافيه كسر والجنين بخير.؟؟؟
لحظة صمت............سعود مصدوووووووم ""الجـــنــــــيــــن"":تغر� �د حامل.
الدكتور:ايوه انتو ماعندكم خبر مبروك هي في الشهر الثاني كمان.
خالد:الله يبارك بعمرك.
الدكتور :الحين تقدر تاخذها وتروح بس لازم ترتاح وماتتحرك كثير "ومد له ورقه"هذي ادويه تصرفها لها وتاخذها بانتظام.
خالد:مشكور يادكتور ماقصرت.
الدكتور:ماسويت شيء هذا واجبي.
ركبو السياره وتغريد طول الطريق ساكته:
خالد:حبيبتي ليه ساكته وسرحانه فيك شيء.
تغريد بهمس:معقوله انا حامل بعد هالسنين.
خالد:الحمد لله الله ماينسى عباده.
تغريد:الف حمد وشكر لك يارب.
:::
أم خالد متشققه والفرحه مو سايعتها:الف الف مبروووك يبه وانتي ياتغريد الف مبروك الله يقومك بالسلامه الله ماينسى عبده.
تغريد:الله يبارك في عمرك ياخاله.
بشاير:الف مليوووون مبرووك اخيرا بصير عمه .
خالد:من قدك عمة فهد بن خالد.
بشاير:لا ياشيخ بدينا بالبزه.
خالد:هههههههههه تستاهلين ...
شهد:الف مبروك خالد الف مبروك غرووده.
تغريد :الله يبارك في حياتكم.
خالد:الا ابوي وينه يمه.
أم خالد:في الشركه.
خالد:يالله اجل بروح اودي تغريد ترتاح وامر ابوي بالشركه ابشره.
تغريد:يالله اجل مع السلامه خالتي مع السلامه يابنات.
ام خالد:فمان الله ,الله يحفظكم.
:
أبو خالد ميت من الفرحه لولده الكبير:الف الف مبروووك ياخالد الحمد لله لك يارب.
خالد:الله يبارك بعمرك.,,بس يبه..,.
أبو خالد:لا بس ولا شيء انا عارف اني تدخلت بحياتك بس كله لمصلحتك يبه اما الحين زوجتك حامل وانا بكلم الرجال نفك الخطبه.
خالد طاح عنه حمل كبييير عن ظهره:الله يخليك لنا ذخر يبه.
::::::::
::::::::
أم عبد الله تزغرد:لولولولولوووووووش.
عبد الله :فرحينا معك يمه.
أم عبد الله:وش ابشرك به ياولدي تغريد اختك حامل.
عبد الله عدل جلسته وفرح حيييل لاخته:مبروووووووك والله انها تستاهل كل خير هي وخالد.
ساره متشققه وفرحانه لاختها الوحيده:الف مبروك يمه بروح ادق ابارك لها.
****
ساره:الحين حامل يالدووبا وانااخر من يعلم.
تغريد:والله كنت بكلمك بس انشغلت.
ساره:ع العموم مبروووك يالغاليه تستاهلين كل خير.وباركي لخالد بالنيابه.
تغريد:الله يبارك فيك.
ساره:مااطول عليك عندي بكره امتحان باي.
تغريد:بايات.
:::::
محمد يكلم خالد اخوه:مبروووووك يابو فهد زوجتك تحمل وانا اخر من يعلم.
خالد:حقك علي بس والله اشغال.
محمد:ع العموم الحمد لله وبشر وش صار ع الموضوع.
خالد:اي موضوع.
محمد:موضوع زواجك.
خالد:لاا أبشرك ابوي كنسل كل شيء لمن درا بخبر الحمل.
محمد:الحمدلله يالله اجل ما ني مطول مع السلامه.
خالد:فمان الله.
"""""
*****
خلود تكلم صديقتها ريم:هلا والله باريم سلامات قلبي ليش غايبه ماقلتي لي شيء امس.
ريم:والله ياقلبي جت فجأه امي كانت تعبانه.
خلود:سلامات ماتشوف شر انشاء الله.
ريم: الشر مايجيك.
خلود:عندي خبر يفرح.
ريم:فرحينا معك.
خلود:تغريد بنت عمي حامل.
ريم:مبروووووك.
خلود:اله يبارك فيك صبروا ونالو لهم ثلاث سنين متزوجين.
ريم:الحمد لله.
خلود:يالله ريوم ماأطول عليك اشوفك بكره بالمدرسه اوكي.
ريم:اوكي باي.
دخل عليها عبد العزيز:من كنتي تكلمين.
خلود:هذي صديقتي ريم.
عبد العزيز:اهاا معك بالصف.
خلود:ايه ليش.
عبد العزيز:لابس سؤال.
خلود:اها طيب عن اذنك وراي مذاكره امتحانات الشهر قربت.
عبد العزيز:الله يوفقك.

رجفة خفوق · #9 05/03/2009, 01:06 AM

- - (الفصل السادس)
َعــلَـىْ أًكُــفِ اَلـْقــَدَرِ نَمْــشِــــيْ ,,
وَ لاْ نَــدْرِيْ عَــنْ اَلْمَــكْــتـُـــوْبْ,,
----
في المدرسه:
خلود:ريووم.
ريم:هلا والله.
خلود:انا عازمه بنات عمي الخميس اللي بعد الامتحانات الشهريه وابيك تجين.
ريم:انتي وبنات عمك بس اخاف احرجهم(ريم بطبعها خجوله).
خلود:ايه والله وبعدين هم ودهم يشوفونك من زمان.
ريم:خلاص اشوف الوالده وارد لك.
خلود:لا الوالد خليها علي.
ريم:ههههههه عاد هذي شغلتك مدري كيف تقنعينها.
خلود:هههههههه سر المهنه.
بيت بو سلطان.
أبو سلطان:هاه ياسلطان وش قلت.
سلطان:اللي تشوفه يبه بس ظنك يوافقون.
ابو سلطان:وليش مايوافقون هذا سلطان ولد حسن التاجر.
سلطان:اجل توكلنا على الله.
ابو سلطان:بكره نروح لهم نخطب اجل.
سلطان:بس بكره انا مشغول خلها الجمعه احسن.
ابو سلطان:خلاص اجل الجمعه الجمعه.
ام سلطان دخلت عليهم:وش عندكم انت وولدك.؟
ابو سلطان مبسوط:ولدك نوا العرس.
ام سلطان فرحانه لولدها:صدق والله ياسلطان وانا اخر من يعلم.
ابو سلطان:مابعد صار شيء .
ام سلطان:ومنهي العروس انا ببالي وحده بخطبهالك.
سلطان:لا ارتاحي يمه بنت صديق لابوي.
أم سلطان :منهي.
أبو سلطان:بنت ابو وليد دانه والجمعه نروح نخطب انشاء الله.
ام سلطان:الله يكتب اللي فيه الخير.
سلطان:اميين انشاء الله.
****
يوم الخميس خلود عازمه البنات وريم صديقتها.
ريم:بنات عمك ماكنهم تاخرو صح.
خلود:تلقينهم قريب الحين.
ويرن الجرس وتدخل ساره وبشاير وتغريد<تغريد وبشاير جابهم خالد عطلة الاسبوع معه تمشيه ويحضرون العزيمه>.
خلود:هلا وغلا باللي جونا.
تغريد:الله يسلمك.
ساره:هلا ريم وش اخبارك واخيرا شفناك.
بشاير:ايه والله من زمان نبي نشوفك من كلام خلود عنك.
ريم:والله حتى انا كنت اتمنى اشوفكم من كلام خلود عنكم.
وقعدو البنات سوالف وضحك.
ريم:خلوده وش رايك تجيبين اشرطت الطق اللي عندك نرقص.
ساره:ايه من زماان مارقصت.
خلود:تكفين ريم مافيني حيل ارقى روحي انتي شوفيها باللسله اللي بدرج غرفتي.
ريم:خلاص بروح اجيبها.
**وراحت تجيب الاشرطه من غرفة خلود**
تغريد:ماشاء الله صديقتك طيبه وحبوبه.
خلود:ايه والله اعتبرها زي اختي واكثر.
+بهاللحظه طلع عبد العزيز من غرفته بيروح لبشاير بيسألها عن شيء<توه قايم مايدري عن البيت >+
ريم:يوووه ياخلود وين وديتي هالسله صار لي ساعه ادور عليها.
عبد العزيز:الحمد لله ياخلود اشوا اني لقيتك في غرفتي.
ريم مو مستوعبه وتلتفت يمه طاحت عينها بعينه:
عبد العزيز لمن شافها انصدم ويقول من هذي اللي جالسه قدامي جمال ودلال وعيون ساحره شكلها مو من بنات عمي بس مين ياترى.
ريم لفت ع السرير وخذت الشرشف وتغطت فيه انتبه لها عبد العزيز وطلع برا الغرفه .
ريم وقفت لحظات مو مستوعبه معقوله هذا اخو خلود اكيد عبد العزيز لان خلود قالت مافيه الا هو ونايم بغرفتهآآه موقف لا احسد عليه.
نزلت ريم ع البنات في الصاله:
خلود:وين الناس وش فيك تاخرتي.
ريم للحين فيها الصدمه:ها لا بس مالقيتها.
ساره:خلاص مو لازم خلود حطي لنا روتانا نرقص على اي شيء.
ريم كانت في عالم ثاني تفكر باللي شافته قبل شوي.

عبد العزيز ركب سيارته ومشى وعقله مو معه مع اللي شافها قبل شوي خذت قلبه وعقله"منو هذي ياترى مو من بنات عمي ايه بعدين اسال خلود.
رجع بالليل متاخر ولقاها سهرانه على فلم:
عبد العزيز:هاي خلوده.
خلود:هلا عزووز.
عبد العزيز:اشوفك اليوم مستانسه من اللي كان عندك.
خلود:بنات عمي عازمتهم ع العشاء.
عبد العزيز:لحالهم.
خلود:ايه وريم صديقتي معهم.
عبد العزيز""اهاا كيف مافكرت في ريم والله البنت حلوه وماتنعاب وصديقة اختي"" :اها عن اذنك بروح انام دايخ.
خلود:تعال يالاخو انت براسك شيء قوله وخلصني من هلاسئله.
عبد العزيز:ياحبيلك فاهمتني.
خلود:اعجبك يالله اسمعك.
عبد العزيز:بصراحه اليوم وهم عندك قمت ورحت غرفتك وشفت ريم فيها ومن شفتها وانا افكر فيها.
خلود:نعم نعم تقزقز صديقتي ياولد ولا في غرفتي بعد!.
عبد العزيز:افهمي يابنت الحلال انا شايفها بالغلط ماكنت ادري عنها .
خلود تستهبل عليه: وانا وش المطلوب مني؟؟
عبد العزيز:اهاا ابيك تشوفين في حياتها احد لانها خاشه مزاجي من زمان وابي اخطبها.
خلود:ايوووه طلعت تعشق ياعزيّز.
عبدالعزيز:عزيّز في عينك وش شايفتني.
خلود:خلاص خلاص يالله عاد خربت علي متابعة الفلم.
عبد العزيز:اوكي طرده يعني ,,سي يو.
خلود:ههه تصبح على خير.
***
يوم الجمعه خطبة سلطان & دانه.
بيت ابو الوليد:حيا الله من جانا تفضلو البيت بيتكم.
ابو سلطان:الله يزيد فضلك.
ابو سلطان:حنا جايينك طامعين في القرب منك ونبي بنتك دانه لولدي سلطان وكلنا امل انها توافق.
ابو الوليد:والله ان سلطان شيخ الرجال ومابه عيب وانا موافق بس البنت بعد لازم نشوف شورها.
أبو سلطان :اكيد اهم شيء راي البنت خذو راحتكم.
ابو الوليد:قم ياولدي ياوليدأسال اختك موافقه ولالا.
الوليد:ابشر يبه.
&غرفة دانه&
الوليد:هاه وش رايك ترا الرجال ماينعاب.
دانه مستحيه من اخوها:اللي تشوفونه.
الوليد:يعني موافقه.
دانه:....
الوليد:الف مبروك دندون الله يتمم لك.
دانه:الله يبارك فيك.
دخل الوليد ووجهه يبشر بالخير:
ابو سلطان:نقول مبروك انشاء الله.
الوليد:مبروك الله يتمم لهم.
ابوالوليد:آآمين مبروك ياولدي.
سلطان:الله يبارك فيك ياعم.
ابو سلطان:خلاص اجل الملكه انشاء الله بعد اسبوع والزواج في العطله بعد شهرين وش قلتو.
ابو الوليد:اللي تشوفه.
ابو سلطان:على بركة الله,, يالله نستاذن.
ابو الوليد:وين ماكملتو قهوتكم.
ابو سلطان:الجايات اكثر انشاء الله.
سلطان فمان الله ياعمي.
ابو الوليد:فمان الكريم.
:::::
ومر الاسبوع واليوم ملكة سلطان ودانه كانت بس للرجال ..
أبو الوليد:الف مبروك ياسلطان وماوصيك على دانه.
سلطان :الله يبارك فيك ياعمي ومايحتاج دانه في عيوني.
ابو سلطان:الف مبروك ياولدي الله يتمم لكم.
سلطان:الله يبارك فيك يبه.
الكل بارك له ونادى الوليد سلطان عشان يدخل على دانه ولاول مره هو بيشوفها.
****
سلطان:الف مبروك يالغاليه.
دانه مستغربه اول مره يشوفني يقول لي يالغاليه:الله يبارك فيك.
مد يده ورفع راسها وطاحت عينها بعينه . سلطان:حرام تحرميني من شوفة هالقمر.
أستحت زوود عن حياها .
ومرت الليله على خير وبعد اسبوعين في بيت ابو خالد:
ابو خالد:ها يبه محمد قل وش عندك.
محمد:بصراحه يبه انا نويت العرس.
ابو خالد مستانس:هذي الساعه المباركه والله وانت في بالك وحده محدده.
محمد:بصراحه يبه انا ودي بساره بنت عمي بندر.
ابوخالد فرح زود:هذي الساعه المباركه منى عيني اشوفكم ماخذين من بنات عمانكم وساره شيخة البنات.
محمد:ومتى ودك نخطب يبه.؟
ابو خالد :وش رايك عطلة الاسبوع نروح الرياض ونخطبها.
محمد:اللي تشوفه يبه.
ابو خالد:على بركة الله.
()()()()
لاكن نفس اليوم في بيت ابو عبد الله كانت ساره تصيح وتترجا امها تقنع ابوها انها ماتبيه.
ام عبد الله:حرام عليك تغصب البنت على شيء هي ماتبيه.
ابو عبد الله:انا اخبر بمصلحة بنتي هي ماتدري عن شيء.
ام عبد الله :حرام عليك البنت توها.
ابو عبد الله:هو ولد صديقي وعزيز علي وعارفه وعارف اخلاقه وقولي لها بلا دلع بنات وبعد اسبوع بيخطبونها رسمي.
ام خالد تنهدت:لاحول ولاقوة الابالله ""
الله يهديك ويرقق قلبك على عيالك يابندر""
*+*+*+
بيت خالد وتغريد بعيد عن هالاجواء.
تغريد:خلاص والله شبعت.
خالد:بس لازم تاكلين عشان البيبي بعد.
تغريد:بس والله شبعت مو قادره.
خالد:خلاص عيوني روحي ارتاحي .
تغريد:تسلم عيونك ,,الا صدق بتروح مع عمي يخطب ساره(تغريد مادرت عن خطوبة ساره من ولد صديق ابوها تقصد محمد اخو خالد)؟
خالد:ايه انشاء الله بكره ماشين.
تغريد:تروحون وتردون بالسلامه.
خالد:الله يسلم عمرك.
^^^^^^^^^^^
* * * *
يوم الخميس بيت بو عبد الله.
ابو عبد الله:حيالله اخوي بو خالد وش هالمفاجأه الزينه والله.
ابو خالد:الله يحييك ياخوي ,,أنابختصر الكلام وبقول لك حنا جايين نخطب بنتنا ساره لولدنا محمد وودنا ماتردونا وش قلت.
ابو عبد الله تفاجأويقول بنفسه ليتك بكرت ياخوي شوي:محمد رجال ولاكل الرجال بس والله ان ساره انخطبت قبل يومين .
محمد بخيييبه:وهي موافقه .
بو عبد الله:بصراحه لا بس انا كنت بغصبها لان الرجال مابه عيب وولد صديقي.
خالد:لا ياعمي الزواج موب بالغصب .
ابو خالد:لاتغصبها خلها تقرر هي اللي تبيه هذي حياتها,.
ابو عبد الله :خلاص الرجال بقول له عن رد البنت وانت يامحمد ماعاش من يردك رجال ولا كل الرجال واعتبرها من الحين موافقه.
محمد:تسلم ياعم بس انت لازم تاخذ رايهالو ماعليك امر.
بو عبد الله :ابشر قم ياعبد الله اسال اختك.
بو عبد الله:تامر يبه.
غاب دقايق ورجع وهو فرحان:ع البركه البنت موافقه والله يتمم لكم.
ابو عبد الله :الف مبروك يامحمد.
محمد وهو متشقق من الوناسه:الله يبارك فيك ياعم.
وهنؤوه ومرت اسبوعين ع الخطبه واليوم الملكه :
|()|()|()|()
ملكة محمد & ساره.
والكل حضرها رجال وحريم وصديقات ساره كلهم.
()ساره كانت لابسه فستان نعووم ليموني وفيه قصات من تحت وذيل مع ورا وكانت حاطه مكياج خفييف ومسويه تسريحه خفيفه رافعه شعرها ومطيحه منه خصل كيرلي وطالعه قمر ..
اما تغريد أختها فكانت لابسه فستان حمل ممسوك بشريطه من تحت الصدر وبعدين فيه قصه وسيعه وكان لابق عليها ومسويه تسريحه خفيفه ومكياج طالعه كيووت.
اما بشاير لابسه فستان ميدي لونه فوشي وكمومه كت وفيه كرستاله ع الخصر وفاكه شعرها الحرير مسيحته وحاطه جلوس وماسكار وبلاشر وطالعه قمر.
وخلود لابسه تيور لحد الركبه كله قصات لونه خربزي مع توب كله كرستال وردي واورنج وخربزي ومكياج خفيف ومسويه كيرلي وطالعه ستايل.()
()()()()
من جهة الرجال.
ابو عبد الله:مبروك ياولدي وماوصيك على ساره.
محمد:الله يبارك فيك ياعمي وساره بعيوني.
أبو سلطان:الف مبروك يابو فهد الله يتمم عليكم.
محمد:الله يبارك فيك.
والكل بارك له وهناه وفرح بهالليله.
غرفة ساره قبل لاتنزل ع الحريم:
ساره:وااااي والله اني ميته خوف خلا ص مو لازم اشوفه .
بشاير:تعوذي من ابليس ترا اخوي مايعض.
خلود:يالله سارونه اقري عليك المعوذات ماشاء الله عليك قمر.
ساره جلست تقرا على نفسها شوي قران عشان تحس بالاطمئنان شوي وتريح اعطابها بعد نص ساعه.
تغريد:ساره حبيبتي يالله عشان المعرس بيدخل بعد شوي.
ساره وهي تقاوم خوفها:يـ..الله.
ونزلت ساره على الحريم وسلمو عليها وباركو لها والجو كان فله طق ورقص ووناسه وبعد شوي كان بيدخل عليهم محمد يشوفها.
بشاير:يالله بنات تغطو محمد بيدخل الحين.
ساره ترجف:لاتخلوني لحالي تكفوون.
ودخل عليها محمد وانبهر من ساره سحرته بنعومتها وجمالها ورقتها ومانزل عينه منها .
محمد:الف مبروك يالغاليه.
ساره وهي منزله عيونها:الله يبارك فيك.
وصورو سوا ومع الاهل وبعدين الكل راح بيته.
&&&&&&&&

رجفة خفوق · #10 05/03/2009, 01:06 AM

- - اكتفي لين اشوف ردود

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

ماشاء الله تبارك الله ماشاء الله لاقوة الا بالله - اللهم اني اسالك الهدى والتقى والعفاف والغنى

رواية دنياي دنياكــ مهما أفترقنا!** لعشاق الرواية السعودية..

-------------------------------------------------------------------------------- سلااااام ع الجميع... هذي اول مشاركه لي بالمنتدى واتمنى ماتخذلوني.. ابي اشوف تفاعلكم ... رواية"{دنياي دنياك

رواية دنياي دنياكــ مهما أفترقنا!** لعشاق الرواية السعودية..