سوال لكل عزوبي .. يتسدح بالملحق ؟
هل تنام على بطنك ؟ او تخم الوسادة بالليل ؟ او تعفس الكنب وتعضه وتسعبل عليه وانت نايم .. او تنام في الشوارع كانك قطو .. او تنام على الكنب وانت تقرا الجريده ،
او تنام ويطلع سرك ستر الله سرك.

اذا كانت الاجابة بنعم فان
كل هذه اعراض لرغبة جامحه وكامنه بالزواج وان ما تلاحقت عمرك راح يجي اليوم اللي يقول فيه الوالد لك :
" الله لا يبارك في الساعة اللي جبنا فيها شغاله ".

عزيزي العزوبي : <<< عبارات اسبوع العزوبيه <<< على غرار اسبوع الشجره.
لا تتخذ قرار الزواج الا وانت
في حالة هدوء تاام بعيدا عن الاثارة والعواطف الجياشه ..
مو تشوف فيديو كليب بعدها تطمر لامك وانت مشبك اصابعك ومميل رقبتك وتقول ( دوروا لي ابي اعرس ) ، ابي اكمل نصف ديني .
مع اني ما ادري عنك ونصفك الاول فما بالك بالنصف الثاني.
يا نصفي الثاني معقوله تنساني

ومن يوم تقول الوالده خلاص بندور لك ، تصير ذاك الشاب الحبيب الرحيب السمح اللي بااله طويل.. ما يتافف اذا وصلهم مشوار ، و يوصلهم للزواجات بكل رحابة صدر .. ويسالهم اول ما يركبون طالعين من العرس ومنتهية لياقتهم .. هاه بشروا ؟
عسى لقيتوا نصفي الثاني >>>>> تكفى يا وائل كفورى ..

قبل ان تتخذ قرار الزواج .. رح صلح شاهي وجب لك مركى وتعال اسمع وش باقول لك . لان الموضوع طوويل وانصح اللي فاتورتهم عاليه يقطع الخط ويقرا .

ستقتصر الاستشارات على الشباب .. و يمكن ما اقدم استشارات للنساء خوفا من انكم تقولون ( ملكع ) وفيه ملا فيه ..
واتهم بالزندقه والدشاره بعد هالايام الواحد ياخذ حذره يقولون ان المشمش كاثر والطماط راخص. <<<<<< ما يحب السياسه.

فابركز على الشباب .. الا اذا الحيتوا يا البنات اني اعطيكم استشاره مجانية.

اولا : مرحلة ما قبل الزواج :
كيف تعرف انك استويت عزيزي الشاب وحان قطافك من بنت الحلال :
7
7

ا : علامات الرغبة في الزواج عند الشاب :
من خلال ملاحظتي للشباب والتغيرات الفسيولوجيه التي تحدث لهم خلال الفترات العمريه .. فقد سجلت الملاحظات التالية:

1 -
اذا بديت تحب الاغاني وتسمعها بمخمخه وتتخيل انك تقول الكلام لوحده .. فاعرف انك ( قاضي ) فتلاحق عمرك وشف لك بنت حلال ، بشرط توافر الشروط الاخرى فيك ( وظيفه مناسبة ، ومبالغ مالية لمواجهة مصاريف العرس ) >>>> التقسيط متاح بدون كفيل في موسسة مباري للعرس على النوته

كذلك اذا صرت تتابع الفيديو كليب وتفتح فمك ولو يناديك ابوك ما ترد عليه.
2 –
اذا بديت تشوف الرجال طالع من الصيدليه ومعه كيس مو واضح اللي داخله وتقول بينك وبين نفسك ( اخ وش هو شاري للمدام ) يا حظه ؟ اكيد بيسون شيء . >>>>>>> يمكن شاي صيني للتخسيس لا يروح بالكم بعيد.
فاعرف انك ( وصلت لمرحلة ) واستحقيت لقب
( اعزب رايح وطي )
بكل جداره .
3 –
اذا بدت تلفت انتباهك القدور والدلال وادوات المطبخ فاعرف انك ستكون زوج حبوب تغسل المواعين وتلبس مريله عليها صورة فيل.
4 –
اذا بديت تقول يا زين بيروت وال ال بي سي والمستقبل ؟ فاعلم اخي الاعزب انك لو انتظرت سنتين ستصدي صواميل ظهرك وتصير بلا مستقبل.
5 –

اذا بديت تمشى بالسوق وتتمنى ان البنت اللي قدامك يطيح اللي هي شايلته علشان تصدم فيها وتقول ( ليمون نعناعه ) فاعرف انك على مشارف انك تكون ( لحسه ) وشهار ما يقبلك ولا منتسب .

6 –

اذا بديت تطلب من صديقك تلفون الباندا وتقول
( هاه فيه شيء جديد )
؟ << رسائل نصيه .

فاعرف ان نظرك بدا يضعف وتبي تثبت لنا انك تشوف بشاشه صغيره فتلاحق عمرك لا تصير المدام تقودك بالاسواق.
7 –
اذا بديت تعطر بعطور نسائيه وتقول ما فيها شيء
( العطورات ليست حكرا على احد )
.. فاعرف انك بديت ( تخق ) لذلك اكرب عمرك واعرس.

لذلك عزيزي الشاب اذا ظهر عندك الاعراض اعلاه كلها او بعضها فاخطب وخلص امورك .. بس خلني اقول لك وش تسوي بالخطبة

ثانيا : اثناء الخطبة :

هناك بعض التكتيكات التي تساعدك على الظهور بمظهر جيد في عيون مدام المستقبل وعيون اهلها
1 –

انضبط وابدا صل بالمسجد . واجعل المحافظة على الصلاة تحول دائم من الخطبة الى اخر عمرك.
لان اهل البنت يبي يسالون شيبان المسجد ويقولون تعرفون فلان .. لذلك صل وابد ( طلطل ) بوجيه المصلين كانك تدور اخوانك.<<<< ما احب هالحركه.

2 –
لا تتهيبل وتروح تتسلف سيارة زميلك ( الفخمة ) وترزها عند باب اللي انت خاطب منهم ، وتتكلف باللبس بحيث تظهر كانك طايح من الجدار ومجبص كلك.. صاير شاقص ومشصب وما تلتفت الا كلك كانك ضبعه في Discovery channal
لان الخطيبة مصيرها تعرف ان السياره مو سيارتك وبالتالي تطيح من عينها .. يا اخي ان رضت فيك كما انت والا بكيفها .. تلقى نصيبك وتلقى هي نصيبها .. وخل عنك فلم احمد زكي
( انا لا اكذب ولكني اتجمل )
<<< تراه ودى ناس كثير بداهيه.
3 -
اثناء الشوفه لا تستحي ابدا و قز البنت من راسها لرجليها ولا يهمك ابوها واخوانها لان الشرع ( يدعمك ) وان قالوا شيء .. قل لهم حديث الرسول صلى الله عليه وسلم
" فلينظر اليها وتنظر اليه فانه احرى ان يودم بينهما "

مع ان الشوفه ما هي الا موشر للراحه النفسيه الا انها ( لا تعكس) الصورة الحقيقية لشخصية الفتاة .
لان البنت غالبا في الشوفه ما تتكلم وحتى لو تكلمت فهي تتكلم بتكلف .
وكما قال الشاعر
( لسان الفتى نصف ونصف فواده **** فلم يبق الا صورة اللحم والدم )
<<<< يضيع مع اللحم في الضحايا خصوصا الكبده يا بعد كبدي..
لا يروح بالكم بعيد.

واذا ماعجبتك البنت من النواحي الشكلية..لا تقول لنفسك " تزوجها والحمد لله ..
واذا حسيت شيء بقلبك لا تجامل وقل لهم ما الله كتب .
4-
في الخطبة ان صار فيه مكالمات بعد ما يوافقون عليك .. فلا تصير لصقه وعلة وريد كل دقيقة داق على البنت .. ( وينكم فيه ) ؟ وش سويتوا اليوم ؟ ما اشتقتي لي؟
وش تسوين ؟ انت على السرير والا في المقلط ؟ << يخرب بيت السوال ؟
ليش تلفونك مشغول ؟ من كنت تكلمين ؟

لانك بعد فترة وجيزه بتطيح من عين البنت وانت تميلح . ويمكن تحسف انها وافقت عليك ، وتفسخ الخطبه.
5 -
لو ( كتبت كتابك ) على البنت قبل بفترة وبديت تاثث بيتك .. لا تاخذ البنت الا علشان تختار غرفة نومها بسسس ، والا باقي الاثاث اختاره انت والا خلها هي اللي تختاره كله ..

لانكم اذا بديتوا تطلعون مع بعض تختارون الاثاث .. فراح يطلع الاثاث مشكل تشكيلة عجيبه والوانه كانها
( شراب تكرونيه عند الحرم )..
لانك جاملتها في اختيارها وهي جاملتك واخترتوا ( حلول وسطيه ) وسويتوا
comprise تسويه ولهذا طلع الاثاث ملخبط .

وقبل ما تاثث قرر وش راح يكون ستايل اثاثك
( كلاسيك ) او ( مودرن ) او ( سعودي )
.. ولا تقعد تخلط بالاثاث .. كلاسيك مع سعودي مع مودرن فيطلع بيتك شوربة كوارع.
كذلك اضبط ميزانيتك على مستوى معين من الاثاث بمعنى .. ما تشتري لي لوحه ب 3000 الاف والكنبات ب 5000 الاف .. يعني ما فيه توازن وتروح تشتري لوحه ثانية من ( حلة بن دايل ) ب 20 ريال ، ومن ايكيا ب 150 ريال .. فيصير بيتك كانه
( حراج ابن قاسم )
من كل بحر قطره.
فتصير مثل اللي بيتهم طين وعندهم
( رولز رويس ).

خلى مستوى الاثاث كله متناسب مع بعض .. واسعاره متناسبة ايضا ويمكن تاجيل شراء
بعض الامور اذا حسيت انك بديت
( تطفر ).
6 –
اياني وياك تظهر بشكل مثالي في الخطبة بل خلك على طبيعتك ، بحيث تقول للبنت هذا اناا ..
مو تصير حبيب بالخطبة وصدام بعد الملكة.

ثالثا : ليلة الزواج :

ليلة العمر والليلة الوحيده اللي تحس فيها انك اهم واحد بالاحتفال .. فلا تصدق عمرك ويكبر راسك.. خلك طبيعي مثلي
ولا تكثر من شرب الشاي والقهوة ليلة العرس بعدين تنتفخ مثانتك ، فتتورط ، لانه صعب اذا رحت جلست مع العروس على
( الكوشه )
.. فجاه تقوم تقول بعد اذنك باروح الحمام .. صدقني
راح تقول البنت اللي هذا اوله ينعاف تاليه
.. فلنفرض انك قمت من الكوشه ؟؟
بعد ما تخلص هل بترجع وتجلس مع العروس مره ثانية ؟؟
والا بتطلع من هناك ؟ بالعربي .. انت بتبلش بلشة ما بعدها بلشة

اما اذا رجعت بيقولون الحريم
( جاه اسهال من الخوف من المدام )
اجل اذا راحوا الشقة بلحالهم وش بيسوي هالخواف.؟
فتصير علك في فم الرايح والجاي وملطشه للصغير والكبير.
2 –
ليلة العرس ارفق على سيارة الرجال اللي انت متسلفها منه .. لانك ممكن تصدم لانك ما تعودت انك تكون بسياره كشخه وجنبك بنت.
<<<<<<< وش دراك؟

3 -

خلك ذوق واسحب يد البنت وحطها على
( القير حق السياره )

وحط يدك فوقها ولا تكثر تفغيص يدها لانك بتتهور وممكن يصير لك شيء والا يجيك ( شد عضلي ) بعدين تصدم باشاره >>> لاحقين خير ان شاء الله .. لا تتصربع الله يسلمك..

واذا حطت يدها عليك لا تخاف .. ثم تقول لها
فكي وافك
7
4 -
اذا جيتوا تدخلون البيت .. افتح الباب وخلها تدخل قبلك وامزح معها شوي ( خشي برجلك اليمين ) وبعد ما تدخلون ( ارقع ) ذيك الزغروته اللي تهز اركان البيت .. ثبت الله اركانك .
رابعا : سواليف ليلة العرس :
يحتار الكثير من الشباب في اي المواضيع يطرح ليلة الزواج وبرايي انه بالامكان طرح مواضيع تتعلق بذكريات الخطوبة .. والابتعاد عن المواضيع الرسمية .. بمعنى تجنب الاتي :
1 –
انتبه تتميلح او تنكت اكثر من اللزوم لان الموضوع
سينقلب ضدك وبدال ما تصير وش زينك تصير
( كخا ).
2 –
انتبه تجيب طارئ ( امك ) ليلة العرس ، وتقعد تقول لبنت الناس من اول ليلة ( انا بصراحه امي اغلى امراة عندي بالعالم ).. انا امي بصراحه ابيك تشيلينها فوق راسك ، انا امي بصراحه ما ابي احد يزعلها ، انا امي بصراحه مالها غيري ..
الله ياخذ بليسك انت وامك لا هالحين ادخل والسبك بالعقال
<<<<<<<< يعصب احيانا بدون سبب مقنع .. ما عليه رجعت طبيعي .. نكمل ..
مافيه شك ان الام قدرها غالي ومكانتها عظيمه بس لكل مقام مقال .. فما فيه مناسبه انك تجيب طارئ امك ، ممكن تاجل الموضوع لليلة اخرى.

3 –

امدح مكياج المدام ، وفستان فرحها لانها تعبت شهور حتى تظهر بهذا المظهر اللي انت تتمتع فيه انت وعيونك المغمصه ..
حتى لو كنت ( كمخه ) في مواضيع الذوق واللبس ولا تفهم فيها شيء امدح وخلك عباراتك فيها صدق بحيث تكون
( الكذاب الصادق ) ..
فهذا من شانه انه يحسس المدام انها جميله بعينك ، ويرفع روحها المعنوية ، ويخليها تهضمك يا ابو كوع ( بني )<<< مفروك لين قال بس فتغير من اسود الى بني .
4 –
انبته ثم انتبه انك تصير عاطفي او تخق ومن اول ليلة تقول للبنت ( بصراحه انا احبك وميت فيك )
.. لانها موكد انها مو مصدقتك
( ما امدى بسم الله تحبها ).
بصراحه كثير من الشباب محروم من ( كل شيء ) <<< وافهموها .. عاطفيا و ...... .
واول ما نلمس يد تختلف عن يد صديقك ( الضب ) .. نخق وبسرعه نسعبل ونقول : اااه الله لا يحرمني منك ، احبك احبك احبك .. ويمكن بعد اسبوع اكرهك اكرهك اكرهك.>>> يااي .

خلك ثقل وخلي سلوكك هو اللي يقول للبنت اني احبك مو اساليب ( قردنه )
احبك بعدين تقول لها
( وش رايك نلعب عريس وعروسه )
؟
ترى هالحركات ما تمشي على البنات الحين .

معاني الكلمات : قردنه : محاولة اقناع جاده يتخللها وضع اليد على الكتف مع تنزيل الراس وكانك بتقول سر للطرف الاخر مع الاتجاه ( لقرنة )
الغرفه.

خامسا : ملابس ليلة العرس :
1 -
بعد ما تفسخ ثوبك وشماغك وعقالك .. تروش الله يصلحك لانه ممكن ريحتك تكون طالعه وانت ما تدري من كثر السلام والقلق اللي عشته في قصر الافراح ولا يهمك انك راش لك كم ( بخه ) على الشعيرات اللي بصدرك .
تنظفوا ( لمتي ) اعلمكم ... همااه ؟

بعد الانتهاء انتبه تلبس ملابس تظهر مفاتنك .. مثلا تجي بلبس داخلي وفانيلة علاقي وتصير كانك من ذولاك المصاريه اللي اسود وابيض ويتطببون على المسبح في النادي من جماعة ( هاااي شله )..
2 -
انتبه تصير قروي وتلبس سروال ابو حبل ذاك اللي يخليك كانك بقره رايحين يبيعونها ، او بيجامة نوم مخططه فتصير كانك
( حمار وحش )
يتكلم عربي.

اختر اللبس المناسب لجسمك ..
مثلا شورتات رياضيه اذا كان جسمك رياضي .. والا اذا كنت دب فخلك بالعقال والشماغ والثوب استر لك وغير ملابسك اذا نامت المدام..
وفاجاها في الصباحية .
اذا كنت سمين البس ملابس فضفاضة شورت وفانيلة
X X X L <<<< انتبه ترى ما اقصد القناة .
3 –
للاحاطة فان قمصان النوم النسائية ( مشققه ) وشفافه وكلها حركات .. انتبه يسول لك ابليس وتقول ( افف البنت خربانه ) .. من هالحين لبست كذا؟؟
ترى الموضة كذاا وتطوروا باااااا عجرت اعلم فيكم .

اذا لبست لك المدام ( قميص نوم راايق ) ترى مو معناهاا
( طب علي )
.. خلك ثقيل والا جيت هالحين اربط ثقالات برجليك.

ترى سمعت بقصه ان واحد طلق الزوجه ليلة الزواج بعد ما شافها لبست له ( لبس مشخلع ).. قال العم : اكيد انها داشره ؟ وحركاتها ما ني متطمن لها << طيب يا كولومبو.
<<<<< احتمت ( كبدي ) يوم سمع القصة من القهر .

سادسا : الخطة المحبوكه للقاء الحميمي :
1 -
حذاري ثم حذاري وهذاني اقول لك ( حذاري ) .. تتحرش بالبنت جنسيا حتى لو كانت زوجتك .. فكما يقال
( احذر ان تبدا حياتك الزوجيه بحادث اغتصاب ).
لان البنت مو معنى انها صارت زوجتك وكتبت هالوريقه يعني انها فصخت الحياء وتبيها تصير لعبة بين ايديك .
2 -
اجعل بداية حياتك الزوجيه قصة رومانسية متعددة الفصول .. ليلة الزواج تكون بمثابة لقاء بين اثنين للتعارف ما فيه الا الحديث واذا كثرت امسك يدها ولا تتعدى لاشياء اخرى .. عسى يدك الكسر ( ممدين )
همااه .
3 -
اليوم الثاني انتبه تستقبل اية زيارات من الاهل .. او من اهلها .. واعزمها في مطعم راق ولا تجلس تجرجر بالبارتشنز وتقعد تناظر فيه فتحه صغيره مع هالجهه او مع ذيك .. وتسدد فيها وتصير كانك مهندس
( صنادق حمام ).
اركد وخلك طبيعي والا قالت البنت وش
( هالعومه ).

4 -
في ليلة اليوم التالي غالبا يكون فيه عشاء عند اهل الولد تعشوا واطلعوا ورح انت وياهاا ( كوفي شوب ) وانتبه تقرا الجرايد او المجلات , وعطها وقتك كله.
<<<<<<< ال يعني الثقافة مقطعه بعض .. طراه انه بيقرا مجلات وصحف في اول عزيمه بكافي شوب.

5 – اليوم الثالث :
حاول تسافر بها عمره بعدين لمدينة جده لسكان المملكة العربية السعودية .. او مدينة اخرى لسكان الخليج .. او
( لقريح وابو زنه لباقي الدول ).
6 –
انتبه تسافر بالمدام شهر عسل .. لا يلعبون عليك .. شهر العسل برايي يوجل الى ان يتم دراسة المراة هل هي تكانه والا
( برتكانه )
.؟؟
بعدين ممكن تصير مواقف بالسفر ما تلقون لها حل .. او سوء فهم فما يترقع بعد ما ترجعون .
شهر العسل اصلا بيكون كله مجاملات ولا تهمك الافلام الهندية تقعد تحسب انك تبي
( تدربي ) من فوق جبل وتمطر عليك انت وياها وانتم ترقصون.
ترى كله ( كوذااب × كوذااب ) هياا سمعت مني والا .. لا ؟؟؟ الله يستتورر عليك.
<<< يجيد اللهجات المحلية.

وابدا بالمدام بالمدن القريبه ثم ابعد فابعد الى ان توديها الى ( هاواي )
ان بغيت .. هذا كله مثل ما قلنا اذا صارت تكانه ..
يعني ايش تكانه ؟ يعني ماهي علة وريد ، او لحوح لدرجة تقترب من صفات ( القراده ) او ( غيور وشكاكه ) لدرجة ان عيونها تلاقط في كل مكان.
اذا صارت احد الانواع السابقة فشقق جوازك وما جاك عندي .
6 -
اللقاء الحميمي لا يمكن تحديد الوقت المناسب له .. بل يعتمد على الظروف والمتغيرات والتي لا يمكن ان اعرفها فانت الذي في ارض المعركه ، فحدد انت ؟ لانه لا يمكن يجي احد يحارب عنك .
واللي ما يجي اليوم .. يجي بكرا .

سابعا : خزعبلات ليلة العرس ومفاهيم لك عليها :

– الطحينية تقوي الجنس .. انتبه تاكلها لانها بتشب وتحمي ( كبدك )
وبتجلس تصبب من العرق عند المدام
من السعرات الحراريه.
2 –
اشرح لزوجتك كل اللي تحبه واللي ما تحبه ليلة العرس وفهمها كل شيء وعلمها الاصول ..
يا اخي لو انها موظف عندك ( كان ) استحيت اول يوم تقوله شيء .. فاول يوم يمكن تاخذه بجوله على اقسام الشركة .
فما بالك بالمدام لا تقعد توريها ( نجوم الظهر ) بانصاف الليالي .
3 –
انسب يوم للقاء الحميمي هو اول ليلة .. انتبه تتوهق بس وخلك رجال واعقل لا يلعبون عليك وتصير صعيدي .
4 -
الزواج ( شر لا بد ) منه >>>>>>> لا يلعبون عليك .. تراه زين وبادي يصير ازين وازين هالسنين التاليه
7
7
7

عزيزي الشاب اتمنى ان تكون استفدت من التلميحات السابقة ..
وعموما تظل هي راي يعكس
... فقط ..
ان بغيت تستفيد من شيء منها والا اضرب بها عرض الحائط وما جاك عندي

ان شاء الله عجبكم مثل ما لطشته




موضوع من : فراشة حواء - في منتدى : منتدى الحياة الزوجية